ލ. އަތޮޅުގައި ޕިކްނިކް އައިލެންޑެއް ހަދަން ނިންމާފައިވާ ކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވިދާޅުވެއްޖެ އެވެ.

ރައީސް ޑރ. މުހައްމަދު މުޢިއްޒު ލ.އަތޮޅަށް ކުރައްވަމުން ގެންދަވާ ދަތުރުފުޅުގައި، މިއަދު ލ. ގަމުގައި ބޭއްވި ޖަލްސާގައި ވަޒީރު ފައިސަލް ވިދާޅުވީ ލ.އަތޮޅުގެ ތަރައްގީއަށް މި ސަރުކާރުން ވަރަށް ގިނަ ޕްރޮޖެކްޓުތަކެއް ރާވާފައިވާ ކަމަށާއި، ސަރުކާރުން ވި ވަޢުދުތައް ހަގީގަތަކަށް ހަދައިދޭނެ ކަމަށެވެ. އެގޮތުން ލ.އަތޮޅުގެ ރައްޔިތުން ބޭނުން ކުރުމަށާއި ލޯކަލް ޓޫރިޒަމް ކުރިއެރުވުމަށް ޕިކްނިކް އައިލެންޑެއް ހަދަން ނިންމާފައިވާކަމަށް ވަޒީރު ވިދާޅުވިއެވެ.

ޕިކްނިކް އައިލެންޑްގެ އިތުރުންވެސް ގިނަ ޕްރޮޖެކްޓު ތަކެއް ލ.އަތޮޅުގައި ހިންގަން ހަމަޖެހިފައިވާ ކަމަށް ވަޒީރު ވިދާޅުވިއެވެ. އެގޮތުން، ވިޒިޓާ އިކޮނޮމީ ކައުންސިލުން މިހާރު ފާސްކޮށްފައިވާ ހެރިޓޭޖް ޕްރޮޖެކްޓް ލ.އަތޮޅުގައި ވެސް ހިންގާނެ ކަމަށް ވަޒީރު ވިދާޅުވިއިރު ރިޔާސީ އިންތިޚާބުގައި ރައީސް ޑރ. މުހައްމަދު މުޢިއްޒު ވައުދުވެވަޑައިގެންނެވި ގޮތަށް ގަމުގައި ހިންގަން ނިންމާފައިވާ 700 އެނދުގެ އައްސޭރި ޓޫރިޒަމް ޕްރޮޖެކްޓުގެ މަސައްކަތް ވެސް ކުރިއަށް ގެންދާ ކަމަށް ވަޒީރު ވިދާޅުވި އެވެ.

ވަޒީރު ފައިސަލް އިތުރަށް ވިދާޅުވީ، ލ.އަތޮޅުގެ ޓޫރިޒަމަށް އިންވެސްޓްކުރަން ބޭނުންވާ ވަރަށް ގިނަ އިންވެސްޓަރުން އެބަ ތިބި ކަމަށާއި، އެ ފަރާތްތަކާ އެކު ސަރުކާރުން އަންނަނީ މަޝްވަރާ ކުރަމުން ކަމަށެވެ.