އިއްޔެ މާލެއަށް ކުރި ވިއްސަރާގައި ޖުމުލަ 132 ތަނަކަށް ފެން ވަދެގެން ރިޕޯޓްކޮށްފައިވާކަމަށް ނޭޝަނަލް ޑިޒާސްޓަ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭ އިން އިއްޔެ ކުރި ވިއްސާރައިގެ އަދާހަމަ ހާމަ ކުރައްވަމުން މިއަދު ބުނެފައިވަނީ، މާލެ ސިޓީގެ އެކި ސަރަހައްދުތަކުގައި ފެންބޮޑުވެ ފެންވަދެގެން ޖުމްލަ 132 ތަނަކުން ރިޕޯޓުކޮށްފައިވާ ކަމަށެވެ. އަދި 122 ތަނަކަށް އެޓެންޑުވެ، 104 ތަނެއްގައި ޖުމްލަ 732 ވެލިބަސްތާ ޖަހާފައިވާކަމަށްވެސް އެންޑީއެމްއޭ އިން ބުނެފައިވެއެވެ.

ރިޕޯޓު ކޮށްފައިވާ ތަންތަނުގެ ތެރެއިން ދިރިއުޅެން ދަތިވާކަމަށް ރިޕޯޓު ކުރެވުނު 10 ގެއެއްގެ ރެޕިޑު އެސެސްމެންޓް ދިވެހި ރެޑް ކްރެސެންޓުގެ އެހީތެރިކަމާއިއެކު ނިންމާ، ދިރިއުޅެން ދަތިވާކަމަށް ފާހަގަ ކުރެވުނު 6 ގެއަކުން ޖުމްލަ 42 މީހުންނަށް ވަގުތީ ބޯހިޔާވަހިކަމާއި 1 ރޭގެ ކެއިން ބުއިން ހަމަޖައްސާދެވިފައިވާކަމަށްވެސް އެންޑީއެމްއޭއިން ބުނެފައިވެއެވެ.

މާލެއިން ފެން ހިއްކުމުގެ މަސައްކަތުގައި ދިވެހި ސިފައިންނާއި ފުލުހުން، މާލެ ސިޓީ ކައުންސިލް އަދި އެމް.ޓީ.ސީ.ސީ އިންވެސް ހަރަކާތްތެރިވެފައިވެއެވެ.

އިއްޔެ މާލޭގެ އިތުރުންވެސް ރާއްޖޭގެ އެކި ހިސާބުތަކަށް ވަނީ ވިދާ ގުގުރުމާއި އެކު ވަރަށް ބޯކޮށް ވާރޭ ވެހިފައެވެ. އެގޮތުން އަތޮޅު ތެރެއަށް ކުރި ވިއްސާރައިގައި ށ. ފީވަކުގެ 20 ގެއަކަށާއި ށ. ފޯކައިދޫގެ 3 ގެއަކަށް ގެއްލުން ލިބިފައިވާކަމަށް އެންޑީއެމްއޭއިން ވަނީ ބުނެފައެވެ. އަދި ތ. ހިރިލަންދޫ އާއި ތ. ވަންދޫއަށް ބޯކޮށް ވާރޭވެހި ފެންބޮޑުވެގެން ފެން ހިއްކުމުގެ މަސައްކަތް ކޮށްފައިވާއިރު މި ހާދިސާގައި ތ. ވަންދޫގެ 1 ގެއަކަށްގެއްލުން ލިބިފައިވާކަމަށްވެސް އެންޑީއެމްއިން ހިއްސާ ކުރެއްވި އަދާހަމައިގައި ވެއެވެ.