ފ.ފީއަލީގެ ބިންހިއްކުމުގެ މަސައްކަތް އިތުރަށް ފުޅާކޮށް، ހިއްކެން އޮތް އެންމެ ބޮޑަކަށް ބިން ހިއްކަވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ނިލަންދެ އަތޮޅު އުތުރުބުރިއަށް ކުރެއްވި ރަސްމީ ދަތުރުފުޅުގައި މިއަދު މެންދުރުފަހު ފީއަލީ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ ފީއަލީގެ ރައްޔިތުންނަށް ބޭނުންވާ ގިނަ ކަންތައްތަކެއް އެބަހުރި ކަމަށެވެ. އަދި އެންމެ މުހިންމު އެއް ކަމަކީ ބިން ހިއްކުން ކަމަށެވެ.

މިދިޔަ ސަރުކާރުން ވަނީ ފީއަލިން 13.8 ހެކްޓަރުގެ ބިން ހިއްކުމުގެ މަސައްކަތް އެމްޓީސީސީއާ ހަވާލުކޮށްފައެވެ. ނަމަވެސް ފީއަލީ ކައުންސިލުން ފާހަގަކުރައްވާފައިވާ ގޮތުގައި ބިން ހިއްކުމުގެ މަޝްރޫޢު ކުރިއަށްދަނީ ރައްޔިތުން އެންމެ ބޭނުންވާގޮތަށް ނޫނެވެ. މިއަދު ބޭއްވި މިޖަލްސާގައިވެސް ފީއަލީ ކައުންސިލްގެ ރައީސް ވަނީ ބިން ހިއްކުމުގެ މަޝްރޫޢު ރައްޔިތުން ބޭނުންވާގޮތަށް ކުރިއަށް ގެންގޮސްދެއްވުމަށް އެދިވަޑައިގެންފައެވެ.

ފީއަލީ ރައްޔިތުންނާ ވާހަކަދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ އެ ރަށު ފަޅުން ގާތްގަނޑަކަށް 15 ހެކްޓަރުގެ ބިމުގެ ޖާގަ އުފެއްދެން އެބައޮތް ކަމަށާއި އަދި އެއަށްވުރެ ބޮޑަށްވެސް ހިއްކެންޏާ އެބައިވެސް ހިމެނޭގޮތަށް ހިއްކައިދެއްވާނެ ކަމަށެވެ. އަދި އެކަމުގެ ސަބަބުން އެރަށަށް ދިމާވެފައިވާ ބޯހިޔާވަހިކަމުގެ މައްސަލައަށްވެސް ހައްލެއް ލިބިގެންދާނެ ކަމަށްވެސް ރައީސް ވިދާޅުވިއެވެ.

މީގެ އިތުރުވެސް ފީއަލީގައި ނުނިމި ހުރި މަޝްރޫއުތަކާއި، އަލަށް ކުރިއަށްގެންދަން ނިންމާފައިވާ މަަޝްރޫއުތައްވެސް ލަސްތަކެއްނުވެ ފެށޭނެ ކަމަށް ރައީސް މުޢިއްޒު ވިދާޅުވިއެވެ. އަދި މަސައްކަތްތައް ކުރިއަށް ގެންދަވާނީ އަވަސް ދުވެއްޔެއްގައި ކަމަށާއި ފީއަލީ ރައްޔިތުން ބޭނުންވާ ތަރައްޤީ އެރަށަށް ގެނެސްދެއްވާނެ ކަމަށް ރައީސް ޑރ. މުޙައްމަދު މުޢިއްޒު ވަޢުދުވެވަޑައިގެންނެވިއެވެ.