ތިން ރަށެއްގައި މަސް ބަންދުކުރާ ކާރުޚާނާ އެޅުމަށް ޗައިނާގެ ކުންފުންޏަކާ އެކު އެއްބަސްވުމުގައި ސޮއިކޮށްފިއެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގައި މިއަދު ބޭއްވި ރަސްމިއްޔާތެއްގައި 3 ރަށެއްގައި މަސް ބަންދުކުރާ ކާރުޚާނާ ޤާއިމުކުރުމަށް ޙަވާލުކޮށްފައިވަނީ ޗައިނާ ސަރުކާރު ހިއްސާވާ ކުންފުންޏެއްކަމަށްވާ ޑޮންގްފަންގް އިލެކްޓްރޯނިކް އިންޓަރނޭޝަނަލް ކޯރޕަރޭޝަނާއެވެ. ރަސްމިއްޔާތުގައި، ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ވަޒީރު އަހުމަދު ޝިޔާމްއެވެ.

މަސްބަންދުކުރާ ކާރުޚާނާ ޤާއިމުކުރަން ހަމަޖެހިފައިވަނީ ދ. މާދެލި، ގދ. ފިޔޯރީ، އަދި ޅ. ފެލިވަރުގައެވެ. އެ ވުޒާރާއިން ވިދާޅުވީ މި އެއްބަސްވުމުގެ ދަށުން 18 މަސް ދުވަހުގެ ތެރޭގައި ތިން ރަށުގައި ފެކްޓްރީ ގާއިމްކުރާނެ ކަމަށެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކުރެއްވި ގޮތުގައި، ދ.އަތޮޅު މަޝްރޫޢު ކުރިއަށް ގެންދާނީ ދެ ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ މަރުހަލާގައި ބަނދަރު ތަރައްގީކުރުމާއި ލޭންޑިން ފެސިލިޓީސް އާއި އެކޮމަޑޭޝަން، މަގުހެދުން އަދި 1500 ޓަނުގެ ކެފޭސިޓީގެ ކޯލްޑް ސްޓޯރޭޖަކާއި ބްރައިންނާއި ބްލާސްޓް ފްރީޒިން ފެސިލިޓީއެއް ގާއިމްކުރާނެއެވެ. އަދި ދެވަނަ ފިޔަވަހީގައި ދުވާލަކު 50 ޓަނުގެ މަސް ރައްކާކުރެވޭ ފެސިލިޓީއެއް ގާއިމް ކުރާނެ ކަމަށްވެސް ވުޒާރާއިން ހާމަކުރެއްވިއެވެ.

ފިޔޯއަރީ މަޝްރޫއުގައި 3،000 ޓަނުގެ ކޯލްޑް ސްޓޯރޭޖް، ބްރައިން، އަދި ބްލާސްޓް ފްރީޒިން ފެސިލިޓީއަކާއި، ދުވާލަކު 100 ޓަނުގެ ޕްރޮސެސިން ފެސިލިޓީއަކާއި، މަސް މީލް ޕްލާންޓަކާއި، ރިހާކުރު ޕްރޮޑަކްޝަން ފެސިލިޓީއެއް ޤާއިމުކުރަން ވަނީ ހަމަޖެހިފައެވެ.

ފެލިވާރު މަޝްރޫއުގެ ދަށުން 38 އަހަރު ވެފައިވާ ކެނަރީގެ ބަދަލުގައި ދުވާލަކު 100 ޓަނުގެ ޕްރޮސެސިން ފެސިލިޓީއެއް ތަރައްގީ ކުރުމަށް ހަމަޖެހިފައިވާކަމަށް ވުޒާރާއިން މައުލޫމާތު ދެއްވައެވެ.

އެއްބަސްވުމުގައި ސޮއި ކުރުމަށް ބޭއްވުނު ޚާއްސަ ރަސްމިއްޔާތުގައި ވާހަކަދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، ރޯމަހުގެ ގޮތުގައި މަސް އެކްސްޕޯޓުކޮށްގެން ރާއްޖެއަށް ގާތްގަނޑަކަށް 91 މިލިއަން ޑޮލަރުގެ އާމްދަނީއެއް ލިބޭއިރު، މަސް ޕްރޮސެސް ކުރުމުން އެ އާމްދަނީ ދެގުނަ ކުރެވޭނެ ކަމަށެވެ.

ވަޒީރު ފާހަގަކުރެއްވި ގޮތުގައި، މި މަޝްރޫޢުގެ ޑިޒައިނިންގއާއި ފައިނޭންސްގެ ކަންކަން އަދި ކުރަންހުރުމާއެކު، މަސައްކަތް ފެށުމަށް އަދި ދެތިން މަސް ހޭދަވާނެއެވެ.