އިގިރޭސި ޕްރެމިއާ ލީގުގައި އާދިއްތަ ދުވަހުގެ ރޭ އަމިއްލަ ދަނޑުގައި 2-0 ގެ ނަތީޖާއަކުން އެސްޓަންވިލާ އަތުން ބަލިވެ، ލީގު ތާވަލްގެ އެއްވަނައަށް އެރުމަށް ލިބުނު ފުރުސަތު އާސެނަލް އިން ނަގާލައިފިއެވެ.

މިދެޓީމު މިސީޒަނުގައި އެސްޓަން ވިލާގެ ދަނޑުގައި ކުޅުނު މެޗު 1-0 ގެ ނަތީޖާއަކުން އެޓީމުން ކާމިޔާބުކޮށްފައިވާއިރު، ރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ފެނިގެން ގޮސްފައި ވަނީ ދާދި ހަމަހަމަ ކުޅުމެކެވެ. އަދި މިހާފުގައިި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

އެގޮތުން މެޗުގެ ފުރަތަަމަ ނުރައްކާތެރި ހަމަލާ ފެނިގެންދިޔައީ އެސްޓަންވިލާގެ އިގިރޭސި ފޯވާޑް އޮލީ ވަޓްކިންސް ގެ ފަރާތުންނެވެ. މެޗު ފެށިގެން ދެވަނަ މިނެޓުގައި އާސެނަލްގެ ޕެނަލްޓީ އޭރިއާ ތެެރެއިން ލިބުނު ހުސް ފުރުސަތުގައި އޭނާ ބޮލުން ފޮނުވާލި ހަމަލާ ދިޔައީ ގޯލާއި އަމާޒުނުވެ ހުރަސް ދަނޑިމަތިން ބޭރަށެވެ.

Advertisement

އޭގެ ފަހުން އާސެނަލް އިން ވަނީ ގާތްގާތުގައި ރަނގަޅު ދެ ހަމަލާއެއް އެސްޓަން ވިލާގެ ގޯލާއި އަމާޒުކޮށް ފޮނުވާލާފައެވެ. އެގޮތުން މެޗުގެ 12 ވަނަ މިނެޓުގައި ކައި ހާވަޓްޒް ފޮނުވާލި ބާރު ހަމަލާ އެސްޓަން ވިލާގެ ކީޕަރު މާޓިނޭޒް ދިފާއުކުރި އިރު އޭގެ ފަސް މިނެޓު ފަހުން އެޓީމުގެ ބްރެޒިލް ފޯވާޑް ގެބްރިއަލް ޖީސަސް ފޮނުވާލި ހަމަލާ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ.

މީގެ އިތުރުން ފުރަތަމަ ހާފުގެ 39 ވަނަ މިނެޓުގައި އެސްޓަން ވިލާގެ ފޯވާޑް އޮލީ ވަޓްކިންސް ފޮނުވާލި ބާރު ހަމަލާއެއް ގޯލުގެ އަރިމަތީ ދަނޑިއަށް އަމާޒުވިއިރު، ޖެހިގެންއައި މިނެޓުގައި އާސެނަލްގެ ފޯވާޑް ބަކަޔޯ ސަކާ އަށް ލިބުނު ހުސް ފުރުސަތުގެ ހުރަހަކަށްވީ ފުރަތަަމަ ހާފުގައި މޮޅު ކުޅުމެއް ދެއްކި އެސްޓަން ވިލާގެ ގޯލް ކީޕަރު މާޓިނޭޒް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ އެސްޓަން ވިލާ އިންނެވެ.  އެގޮތުން ދެވަނަ ހާފުގެ 62 ވަނަ މިނެޓުގައި އެޓީމުގެ މިޑްފިލްޑަރު ޔޫރީ ޓިލަމަންސް ފޮނުވާލި ބާރު ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، އެޓީމުން މެޗުގެ ލީޑު ހޯދީ ދެވަނަ ހާފުގެ 84 ވަނަ މިނެޓުގައެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ ޖެމެއިކާ ފޯވާޑް ލިއޮން ބެއިލީ އެވެ. އަދި އޭގެ ތިން މިނެޓު ފަހުން އެޓީމުގެ އިގިރޭސި ފޯވާޑް އޮލީ ވަޓްކިންސް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އެސްޓަންވިލާ ކުރީގައި އޮވެގެންނެވެ. އަދި މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 33 މެޗުން އެސްޓަން ވިލާ އަށް 63 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ ހަތަރުވަނައިގައެވެ. އަދި މިމެޗުން ބަލިވި އާސެނަލް އަށް ލީގުގައި ކުޅުނު 32 މެޗުން ލިބުނު 71 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ ދެވަނައިގައެވެ.