ލައިސަންސް ފީ ސީދާ ކައުންސިލްތަކަށް ލިބޭ ގޮތަށް ހަދަން ނިންމަވައިފިއެވެ.

ދަތުރުފަތުރާއި މަދަނީ އުދުންތަކާ ބެހޭ ވުޒާރާއިން ބޭއްވި ނުސްވެރިންގެ ބައްދަލުވުމުގައި ވަޒީރު މުޙައްމަދު އަމީން ވިދާޅުވީ ކައުންސިލްތަކުން ދޭ ޚިދުމަތެއްގެ މަންފާ، ކައުންސިލުތަކަށް ނުލިބޭތީ އެކަމުގެ ކަންބޮޑުވުން ވަރަށް ގިނަ ކައުންސިލްތަކުން ފާހަގަކޮށްފައިވާކަމަށެވެ. އެހެންކަމުން އެކަން ޙައްލެއް ހޯދައިދެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ލައިސަންސް ފީ ސީދާ ކައުންސިލްތަކަށް ލިބޭ ގޮތަށް ހަދަން ނިންމަވާފައިވާކަމަށް އަމީން ވިދާޅުވިއެވެ.

"އަޅުގަނޑުމެންގެ ސަރުކާރުން ޑރ. މުއިއްޒު ނިންމަވާފައި އޮތީ، ކައުންސިލްތަައް ބާރުވެރިކުރުވުމަށްޓަކައި އެ ބޭފުޅުންނަށް ލިބެން އޮތް އެންމެ ބޮޑު މިނެއްގައި އެ ބަޖެޓްތައް ދޫކުރެއްވުން، ހަމަ އެއާއެކީގައި ކައުންސިލްތަކުން ކުރާ މަސައްކަތަކަށް އެ ހިދުމަތަކަށް އަގު ނުލިބޭ ކަމަށްވަންޏާމުން ދަތިތަކެއް ކުރިމަތިވާނެކަން އަޅުގަނޑުމެންނަށް އެނގޭ،". ވަޒީރު ވިދާޅުވިއެވެ.

މިހާރު ލައިސަންސް ދޫކުރުމުގެ ޚިދުމަތަށް ދައްކަން ޖެހޭ ފައިސާ ދައްކަނީ ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއަށެވެ. އެހެންކަމުން އެ ޚިދުމަތުގެ އެއްވެސް ނަފާއެއް ކައުންސިލްތަކަކަށް ނުލިބެއެވެ.

މީގެއިތުރުން ވަޒީރު ވިދާޅުވީ، ކަނޑުދަތުރުކުރާ އުޅަނދުތައް، އަހަރަކު އެއްފަހަރު ހައްދަންޖެހޭ ސަލާމަތީ ސެޓްފިކެޓް އައު ކުރަންޖެހޭ މުއްދަތުވެސް އިތުރުކުރަން ނިންމާފައިވާކަމަށެވެ. އެގޮތުން މި މުއްދަތު އިތުރުކުރަން ނިންމާފައިވަނީ 5 އަހަރަށެވެ.

ސެޓްފިކެޓް ހައްދަންޖެހޭ މުއްދަތު އިތުރުކުރިނަމަވެސް، އުޅަނދުގެ ސަލާމަތީ ކަންކަން ކަށަވަރުކުރަން ކުރަންޖެހޭ ކަންކަން ޤަވާއިދުން ކުރިއަށްގެންދާނެކަމަށް ވަޒީރު ވިދާޅުވިއެވެ.