ރާއްޖޭގައި ރޯގާގެ ގޮތުގައި ޢާންމުކޮށް ފެތުރޭ ބަލިތައް ފެތުރުނު މިންވަރު ފެބްރުއަރީ މަހާ އަޅާބަލާއިރު މާޗު މަހު އިތުރުވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

މިއަދު އެޗްޕީއޭއިން ހާމަކުރެއްވި ތަފާސްހިސާބުތަކުން ދައްކާގޮތުގައި ޑެންގީ ހުމާއި އަރިދަފުސް ރޯގާ އަދި ބޭރަށްހިންގުން ވެސް މިދިޔަ މަހު ވަނީ އިތުރުވެފައެވެ.

އެގޮތުން ފެބްރުއަރީ މަހު ޑެންގީ ހުމުގެ 116 ވޭދަނަ ރިޕޯޓުކޮށްފައިވާއިރު، މިދިޔަ މަހު ޑެންގީ ހުމުގެ 119 ވޭދަނަ ރިޕޯޓުކޮށްފައިވާ ކަމަށް ތަފާސްހިސާބުތަކުން ދައްކައެވެ. މިއީ ޖެނުއަރީ މަހާ އަޅާބަލާއިރު 18% ދަށް ޢަދަދެކެވެ.

އަރިދަފުސް ރޯގާ ޖެހިގެން ފެބްރުއަރީ މަހު ރިޕޯޓުކޮށްފައިވަނީ 29،184 މީހުންނެވެ. މި ޢަދަދު މިދިޔަ މަހު ވަނީ 33،637 މީހުންނަށް އިތުރުވެފައެވެ.

މިދިޔަ މަހު ބޭރަށް ހިންގުމާއި ހޮޑުލުމުގެ 5428 ވޭދަނަ ރިޕޯޓުކޮށްފައިވާއިރު މިއީ ފެބްރުއަރީ މަހާ އަޅާ ބަލާއިރު 5% ގެ އިތުރުވުމެކެވެ. މީގެ އިތުރުން ވައިރަލް ހުމުގެ ވޭދަނަތައް ފެބްރުއަރީ މަހާ އަޅާބަލާއިރު މިދިޔަ މަހު ވަނީ 32% އިތުރުވެފައެވެ.

އެޗްޕީއޭއިން ހާމަކުރެއްވި ގޮތުގައި ޑެންގީ ހުން އިތުރުވެފައިވަނީ މާލޭ ސަރަހައްދުގެ އިތުރުން ހއ، ހދ، ނ، ކ، ގދ، ޏ، ލ އަދި ސ އަތޮޅުގައެވެ.

ބޭރަށް ހިންގުން މާލޭ ސަރަހައްދުގެ އިތުރުން ހއ، ހދ، ބ، ޅ، ކ، އއ، ވ، މ، ފ، ދ، އަދި ލ އަތޮޅުގައި އިތުރުވެފައިވާއިރު ވައިރަލް ހުން އިތުރުވެފައި ވަނީ މާލޭ ސަރަހައްދާއި ހއ، ހދ، ނ، އއ، ފ، ގދ، އަދި ސ އަތޮޅުގައެވެ. މީގެ އިތުރުން ރާއްޖޭގެ ގިނަ އަތޮޅުތަކުގައި އަރިދަފުސް ރޯގާ ޖެހޭ މިންވަރު އިތުރުވެފައިވާ ކަމަށް އެޗްޕީއޭ އިން ވިދާޅުވިއެވެ.

ބަލިތައް ފެތުރޭ މިންވަރު އިތުރުވެފައި ވުމާއެކު އެޗްޕީއޭ އިން ވަނީ އަރިދަފުސް ރޯގާ އަދި ނޭވާ ލާ ނިޒާމަށް ޖެހޭ ބަލިތަކުން ރައްކާތެރިވެ ތިބުމަށް އިލްތިމާޒު ކުރައްވާފައެވެ.