ޝަރުޢީ ދާއިރާގެ މައްޗަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނުފޫޒެއް ނެތްކަން މިއަދު ހާމަ ވެއްޖެ ކަމަށް ޕީއެންސީގެ މަޖިލިސް އިންތިޚާބުގެ އިސް ތަރުޖަމާނު، އަދި އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވެފައި ވަނީ ކުރީގެ ރައީސް ޔާމީނުގެ މައްޗަށް އިއްވާފައިވާ 11 އަހަރުގެ ޖަލު ޙުކުމް، މިރޭ ހައިކޯޓުން ބާޠިލުކުރުމާ ގުޅިގެން އެކްސްގައި ހީނާ ކުރެއްވި ޕޯސްޓެއްގައެވެ.

އެކްސްގައި ހީނާ ކުރެއްވި ޕޯސްޓުގައި ވަނީ، ވޭތުވެދިޔަ 5 އަހަރު ރައީސް ޔާމީނަށް އަނިޔާދީ ޖަލުގައި ބަންދުކޮށްގެން ގެންގުޅުނީ އެމްޑީޕީންކަން މިއަދު ހާމަ ވެފައިވާ ކަމަށެވެ. އަދި ރައީސް ޔާމީނު ރިޔާސީ އިންތިޚާބުގައި ވާދަކުރުމުގެ ފުރުޞަތުން މަޙްރޫމްކުރީ ކޯޓުތަކަށް ނުފޫޒު ފޯރުވައިގެން ސީދާ އެމްޑީޕީންކަމަށާއި، އެއްވެސް ލުޔެއްނުދީ ރޯދަމަހުވެސް ޖަލުގައި އެމަނިކުފާނު ބޭއްވީ އެމްޑީޕީން ކަމަށެވެ.

މީގެ އިތުރުން، ރައީސް ޑރ. މުޙައްމަދު މުޢިއްޒު އެމަނިކުފާނުގެ ވަޢުދުފުޅު ފުއްދަވައިފި ކަމަށާ މިއަދު ރައީސް ޔާމީން މިނިވަންވެގެން އެދިޔައީ ރައީސް ޑރ. މުޙައްމަދު މުޢިއްޒުގެ ވެރިކަމުގައި އެއްވެސް ނުފޫޒެއް ނެތި، ޝަރުޢީ ނިޒާމުގެ ތެރެއިން ކަމަށްވެސް ހީނާ ވިދާޅުވިއެވެ.

ވ. އާރަށުގެ މުޢާމަލާތާ ގުޅިގެން ރިޝްވަތު ޤަބޫލުކުރުމާއި، މަނީ ލޯންޑްރިންގެ ކުށުގައި ފަސް މިލިއަން ޑޮލަރުން ޖޫރިމަނާ ކުރުމާއެކު ޖުމްލަ 11 އަހަރުގެ އަހަރުގެ ޖަލު ޙުކުމެއް ކުރީގެ ރައީސް ޔާމީން އަބްދުލް ޤައްޔޫމަށް އިއްވާފައި ވަނީ 2022 ވަނަ އަހަރުގެ ޑިސެމްބަރު މަހުގެ 25 ގައެވެ. ނަމަވެސް މިއަދު ހައިކޯޓުން ވަނީ ރައީސް ޔާމީނުގެ މައްޗަށް އިއްވާފައިވާ ޙުކުމްތައް ބާޠިލުކޮށް އެ މަނިކުފާނު މިނިވަން ކުރައްވާފައެވެ.