އެމްޑީޕީގެ ވެރިކަމުގައިވަނީ އިސްލާމްދީނުގެ ޙުރުމަތްކަނޑާފައިކަމަށް ޕީއެންސީގެ މަޖިލިސް އިންތިޚާބުގެ އިސް ތަރުޖަމާނު، އަދި އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.
މިއަދު ޕީއެންސީއިން ބޭއްވި ނޫސްވެރިންގެ ބައްދަލުވުމުގައި ހީނާ ވިދާޅުވީ އެމްޑީޕީގެ ވެރިކަމުގައި އިސްލާމްދީނަށް ދޭންޖެހޭ އިޙްތިރާމު ވަރަށް ބޮޑަށް ކުޑަކޮށްފައިވާކަމަށެވެ. އެގޮތުން ދީނަށް ފުރައްސާރަ ކުރާ މީހުންނަށް އެއްވެސް ފިޔަވަޅެއް އަޅާފައި ނުވާކަމަށްވެސް ހީނާ ވިދާޅުވިއެވެ.
"އެމްޑީޕީގެ ވެރިކަމުގަ މިއޮތީ އިސްލާމްދީނުގެ ޙުރުމަތް ކަނޑާ އިސްލާމްދީނަށް ވަރަށް ބޮޑަށް އިޙްތިރާމް ކުޑަކޮށްފަ. އިސްލާމްދީނަށް ފުރައްސާރަ ކުރުމާ ކީރިތި ރަސޫލާއަށް ފުރައްސާރަކޮށް، ކީރިތި ޤުރްއާނަށް ހަޖޫޖަހާ އަދި ހަމަ އެހެންމެ މިސްކިތްތަކުގެ ޙުރުމަތް ކަނޑާ އަދި މަގުމަތީގަ އިސްލާމްދީނަށް ފުރައްސާރަކޮށް މިފަދަ ކަންތައްތައް ކުރަމުން ދިޔަ ފަރާތްތަކަށް އެމްޑީޕީގެ ސަރުކާރުގަ އެއްވެސް ކަހަލަ ފިޔަވަޅެއް ނޭޅުނު."
ހީނާ ވަލީދު ވިދާޅުވިއެވެ.
މީގެ އިތުރުން އިސްލާމްދީނަށް ފުރައްސާރަ ކޮށްގެން ހައްޔަރު ކުރެވުނު މީހުން ދޫކޮށްލާ އެމީހުންނަކީ ސިކުނޑި ހަމަނުޖެހޭ މީހުން ކަމުގަ ނިންމާފައި ވާކަންވެސް ނޫސްވެރިންގެ ބައްދަލުވުމުގައި ހީނާ ފާހަގަކުރެއްވިއެވެ.
ބައްދަލުވުމުގައި ހީނާ އިތުރަށް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްލާމްދީނަށް ދެއްވާ އަހަންމިއްޔަތުކަން މިދިޔަ ރޯދަ މަހު ފެނިގެންގޮސްފި ކަމަށެވެ.
"އަލަށް މިފަހަރު ރަމަޟާންމަހުގެ ފަހު 10 އަކީ ބަންދު ދުވަސްތަކެއް ކަމުގަ ހަމަޖައްސާ އަދި ހަމަ އެހެންމެ އެދުވަސްތަކަކީ ދިވެހި ހުރިހާ ރައްޔިތުންނަށްވެސް އަޅުކަމުގަ ޝާމިލް ވެވޭނެ ފަދަ ގޮތަކަށް، އެ ވަގުތުތައް ދެއްވޭނެ ފަދަ ގޮތަކަށް އެކަން ކުރެވިގެން ދިޔަ ކަމީ ރައީސުލް ޖުމްހޫރިއްޔާ އިސްލާމީކަންތައްތަކާ އަދި އަޅުކަމާ މިފަދަ ކަންތައްތަކަށް ދެއްވާ އަހަންމިއްޔަތު އަޅުގަނޑުމެންނަށް ހާމަވެގެން ދިޔަ ކަމެއް."
ހީނާ ވިދާޅުވިއެވެ.
މީގެ އިތުރުން މިދިޔަ ސަރުކާރުގައި ކޮރަޕްޝަންގެ މައްސަލަތަކާއި ދަރަނި އިތުރުވެފައިވާކަންވެސް ހީނާ ބައްދަލުވުމުގައި ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
