ކުރީ ސަރުކާރުން ފެށި އުމްރާނީ ތަރައްގީގެ އެންމެ ބިޔަ މަޝްރޫޢު، ތިލަމާލެ ބްރިޖުގެ މަޝްރޫޢު މީގެ ކުރިން ނިންމެން އޮތް ތާރީޚަށްވުރެ ތިންމަސް ކުރިން ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިއަދު ވަނީ ގުޅިފަޅާއި ބްރިޖުގެ މަސައްކަތް ކުރިއަށްދާ ގޮތް ބައްލަވާލައްވާފައެވެ. އެއަށްފަހު ނޫސްވެރިންނަށް ދެއްވި ބަސްދީގަތުމެއްގައި އެމަނިކުފާނު ވަނީ ބްރިޖުގެ މުޅި މަޝްރޫޢުގެ 36 އިންސައްތަ މަސައްކަތް މިހާރު ނިމިފައިވާ ކަން ފާހަގަކުރައްވާފައެވެ.
މިއާއެކު ރައީސް ވިދާޅުވީ، މިދިޔަ ފަސް މަހުގެ ތެރޭގައި ބްރިޖުގެ މަސައްކަތް އިހުނަށްވުރެ ބާރު ސްޕީޑްގައި ކުރިއަށް ގެންދެވިފައިވާ ކަމަށެވެ. އެގޮތުން ސަރުކާރު ބަދަލުވެގެން އައިއިރު ދިޔަ ސްޕީޑަށްވުރެ ގާތްގަނޑަކަށް 7 ޕަސެންޓްގެ ކުރިއެރުމެއް ލިބިފައިވާ ކަން ފާހަގަކުރައްވައި ރައީސް ވަނީ އަންނަ އަހަރުގެ ނިޔަލަށް ބްރިޖު މަޝްރޫއު އެއްކޮށް ނިންމާލެވޭނެ ކަމަށް އުއްމީދު ކުރައްވާ ކަމަށެވެ.
ސަރުކާރު ބަދަލުވެގެން އައިއިރު ދިޔަ ސްޕީޑަށްވުރެ ބާރު ސްޕީޑުގައި، ގާތްގަނޑަކަށް 7 ޕަސެންޓްގެ ޕްރޮގްރެސް އެޗީވްމަންޓެއް ލިބިއްޖެ މިދިޔަ ފަސް މަހުގެ ތެރޭގައި. އޭގެ ސަބަބުން އޯވަރޯލް ޕްރޮޖެކްޓްވެސް މިހާރު ގާތްގަނޑަކަށް 1.2 ޕަސެންޓްވަރު އަހެޑްއޮފް ޝެޑިއުލްގައި މިއުޅެނީ. ޕްރޮޖެކްޓް މިހާރު އޮތް ގޮތުން އޮރިޖިނަލީ އަޅުގަނޑުމެންނާ ހަވާލުވިއިރު ގޮއްސަ އިން ހިސާބަށް ބަލާއިރުގައި ނިމެން އޮތް ވަރު، އެއީ ވިލިނގިއްޔާ ހަމައަށް ނިމެން އޮތީ އަންނަ އަހަރު ނިމޭތަނަށް. 2025 ގައި ނިމެނީ. ގުޅި ފަޅާ ހަމައަށް ނިމެން އޮތީ 2026 ގެ މާރިޗު. ނަމަވެސް މިހާރު ސްޕީޑް ދާގޮތުން އިތުރަށް މަސައްކަތް އެބަ ކުރެވޭ. އިތުރު އާލާތްތައް ގެނެސް އަވަސްކޮށް. އަވަސް ކުރެވެން ހުރި ހުރިހާ ކަމަެއް ކުރަން. އަޅުގަނޑުގެ ވަރަށް ބޮޑު އުއްމީދު ކޮށްގެން މިހުރީ މި އަންނަ އަހަރުގެ ނިޔަލަށް، އޭގެ މާނައަކީ މުޅި ޕްރޮޖެކްޓް ނިންމަން އޮތް ތާރީޚަށްވުރެ ތިންމަސް ދުވަސް އަވަހަށް މުޅި ޕްރޮޖެކްޓް ނިންމާލެވޭތޯ
ރަޢީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް ވިދާޅުވީ އެމަނިކުފާނު ވެރިކަމާއި ހަވާލުވެޑައިގެން ހިސާބުން ފެށިގެން ބްރިޖުގެ މަސައްކަތް ވަރަށް ގާތުން ބައްލަވަމުންދާ ކަމަށެވެ. އެގޮތުން ކޮންސްޓްރަކްޝަން މިނިސްޓަރާއި އެ އެމިނިސްޓްރީގެ އިސް ބޭފުޅުން އެ މަސައްކަތް ވަރަށް ގާތުން ބައްލަވަމުންދާކަން ފާހަގަ ކުރެއްވިއެވެ.
ރައީސް ވިދާޅުވިގޮތުގައި ރާއްޖޭގެ ރައްޔޮތުންނަށް ފައިދާ ވާނެ އެފަދަ ހުރިހާ މަޝްރޫއެއްވެސް ބާރު ސްޕީޑްގައި ކުރިއަށް ގެންދަވަން އެމަނިކުފާނު ބޭނުންވެއެވެ.
ތިލަމާލެ ބްރިޖު މަޝްރޫއުގެ ދަށުން 6.7 ކިލޯމީޓަރުގެ ދިގު ބްރިޖަކާއި ކޯސްވޭ ލިންކެއް އަޅާނެއެވެ. އެގޮތުން ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 މީޓަރު ހުންނާނެ ކަމަށް އެފްކޮންސް އިން ބުނެއެވެ.
Advertisement
This content is created and paid for by advertisers and does not involve Voice Journalists
