މިއަހަރުގެ ބޮޑު އީދު ފާހަގަ ކުރަން ބޭނުންވާ ރަށްރަށުން އެކަމަށް އެދި ދިވެހިބަހާއި ސަގާފަތާއި ތަރިކައާ ބެހޭ މިނިސްޓްރީ އަށް ޕްރޮޕޯޒަލް ހުށަހަޅަން ހުޅުވާލައިފިއެވެ.

ގައުމިިއްޔަތު މިނިސްޓްރީން މިއަދު ކުރި އިއުލާނެއްގައި ބުނީ އެ މިނިސްޓްރީ އާއި ގުޅިގެން މިއަހަރުގެ އަޟްހާ އީދު ފާހަގަކުރަން ބޭނުންވާ ރަށްރަށުން އެކަމަށްއެދި ޕްރޮޕޯޒަލް ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.

ރަށްރަށުން ހުޅުވައިލާ ޕްރޮޕޯޒަލް ތަކުގެ ތެރެއިން މިނިސްޓްރީން ފުރުސަތު ދޭނެ ރަށް ކަނޑައަޅާނީ އެރަށަކުން ކުޅޭނެ ކުޅިވަރުތަކަށާއި، ކައުންސިލުން ކުރައްވާނެ ހަރަދުތަކާއި، އަދި އަގެއް ނުނަގާ އެ ރަށަކުން ކޮށްދޭނެ ކަންތަތަކަށް ބަލައިގެން ކަމަށް ވެސް އިއުލާނުގައިވެއެވެ.

Advertisement

އެގޮތުން މިނިސްޓްރީ އާއި ގުޅިގެން ތިން ރަށެއްގައި މިއަހަރުގެ އަޟްހާ އީދު ފާހަގަކުރުމަށް ނިންމާފައިވާއިރު، މި ތިން ރަށް ކަނޑައަޅާނީ މިނިސްޓްރީ އަށް ހުށައެޅޭ އެންމެ ރަނގަޅު ޕްރޮޕޯޒަލް އެއް ބެލުމަށްފަހު ކަމަށް މިނިސްޓްރީން މައުލޫމާތު ދެއެވެ.

އެހެންކަމުން މި ކަމަށް ޝައުގުވެރިވާ ރަށްތަކުން މެއި 9 ވާ ބުރާސްފަތި ދުވަހުގެ 13:00 ގެ ކުރިން ޕްރޮޕޯޒަލް [email protected] އަށް އީމެއިލް ކުރުމަށް މިނިސްޓްރީން ވަނީ އެދިފައިއެވެ.