މަސައްކަތްތެރިންގެ ޓްރޭޑް ޔޫނިއަންތަކާއި ވަޒީފާދޭ ފަރާތްތަކުގެ ޔޫނިއަންތަކުގެ ވަގުތީ ދަފްތަރު އެކުލަވައިލުމަށް މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އިން ނިންމައި، ދަފުތަރުގައި ރަޖިސްޓްރީވުމުގެ ފުރުސަތު ހުޅުވާލައިފިއެވެ.

 މިނިސްޓްރީ އޮފް ހަޔަރ އެޑިޔުކޭޝަން އިން ކުރި އިއުލާނެއްގައި ބުނީ، އިންޑަސްޓްރިއަލް ރިލޭޝަންސްއާގުޅޭ ޤާނޫނު ގައި ވާގޮތުން، އެ ޤާނޫނަށް ޢަމަލުކުރަން ފެށުމަށްފަހު، މަސައްކަތްތެރިންގެ ޓްރޭޑް ޔޫނިއަންތަކާއި ވަޒީފާދޭ ފަރާތްތަކުގެ ޔޫނިއަންތައް ރަޖިސްޓަރީކުރާނީ، އަދި ރަޖިސްޓްރޭޝަނާ ގުޅޭގޮތުން ޢަމަލުކުރާނީ، އެ ޤާނޫނުގައިވާ ގޮތުގެމަތިން ކަމަށެވެ.

މިނިސްޓްރީން ބުނީ، އެ ޤާނޫނުގެ 16 ވަނަ މާއްދާގެ (ހ) ގެ (2) ގައިވާ ގޮތުން، އެ ޤާނޫނުގެ ދަށުން ރަޖިސްޓަރީކުރާ ޔޫނިއަންތަކުގެ ދަފްތަރު އެކުލަވައިލަން ޖެހޭ ކަމަށެވެ.

އެގޮތުން، ޖަމްޢިއްޔާތަކުގެ ޤާނޫނު ގެދަށުން ރަޖިސްޓަރީކޮށްގެން މިހާރު ހަރަކާތްތެރިވާ ޖަމްޢިއްޔާތަކާއި ޖަމާޢަތްތައް، ޓްރޭޑް ޔޫނިއަންގެ ގޮތުގައި އިންޑަސްޓްރިއަލް ރިލޭޝަންސްއާގުޅޭ ޤާނޫނު ގެ ދަށުން ހަރަކާތްތެރިވުމަށް ފުރުސަތުދިނުމަށްޓަކައި ވަގުތީ ދަފުތަރެއް އެކުލަވައިލަން ބޭނުންވާކަމަށް މިނިސްޓްރީގެ އިއުލާނުގައި ވެއެވެ.

އެހެންކަމުން މިނިސްޓްރީން ވަނީ ރާއްޖޭގައި މިހާރު ޙަރަކާތްތެރިވާ އެފަދަ ޖަމްޢިއްޔާތަކާއި ޖަމާޢަތްތައް، ވަގުތީ ދަފްތަރުގައި ހިމެނުމަށްޓަކައި އެ ފަރާތްތަކުން، https://forms.gle/Kt2qdCub9fAPcRMV7 މި ލިންކުގައިވާ ފޯމު ފުރުމަށް އެދިފައެވެ.