ދިވެހި ރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން ބޭސްވެރިކަން ކިޔަވަމުންދާ ދަރިވަރުންގެ ކިޔެވުން މައި ކެމްޕަހަށް ބަދަލުކުރި ނަމަވެސް، ދަރިވަރުންގެ ކިޔެވުމަށް ބުރޫ ނާރާނެ ކަމަށް އެމްއެންޔޫ އިން ބުނެފިއެވެ.

އެމްއެންޔޫއިން މި ފަދައިން ބުނެފައިވަނީ އެމްއެންޔޫއިން ބޭސްވެރިކަން ކިޔަވަމުންދާ ދަރިވަރުން ކިޔެވުމަށް ދަރުމަވަންތަ ހޮސްޕިޓަލުން ދޫކޮށްލައިފައިވާ ދެ ފަންގިފިލާ ހުސްކުރަން އެންގުމާ ގުޅިގެންނެވެ.

އެމްއެންޔޫ އިން މިއަދު ނެރުނު ބަޔާނެއްގައި ބުނެފައިވަނީ މެޑިކަލް ސުކޫލުގެ ވަސީލަތްތައް މައި ކެމްޕަހަށް ބަދަލުކުރަން ނިންމީ ހޮސްޕިޓަލުގެ ޚިދުމަތް ފުޅާކޮށް ޢާްންމު ރައްޔިތުންނަށް ކަންކަން ފަސޭހަ ކުރުމަށް އިތުރު ޖާގަ ބޭނުންވާތީ ކަމަށެވެ. އަދި މި ބަދަލުގެ ސަބަބުން ރާއްޖޭގެ ރައްޔިތުންނަށް ކުރާނެ ފައިދާ ބޮޑުވާނެ ކަމަށް ޤަބޫލު ކުރެވޭ ކަމަށްވެސް އެމްއެންޔޫގެ ބަޔާނުގައި ވެއެވެ.

Advertisement

2018 ވަނަ އަހަރު ޤައުމީ ޔުނިވަރސިޓީގެ މެޑިކަލް ސްކޫލު ދަރުވަމަވަންތަ ހޮސްޕިޓަލުގައި ޤާއިމުކުރީ ވަގުތީ ގޮތުންނެވެ. މިހާރުވެސް ދަރުމަވަންތަ ހޮސްޕިޓަލުގައި ކިޔަވަމުންދާ ދަރިވަރުންގެ ކިޔެވުން މައި ކެމްޕަހަށް ބަދަލުކުރިނަމަވެސް އެ ދަރިވަރުންނަށް ޕްރެކްޓިކަލް ލެބުތަކުން ދޭ ޚިދުމަތްތަކަށް ބުރޫނާރާނެ އިންތިޒާމެއް ހަމަޖައްސަން މަސައްކަތް ކުރަމުންދާކަމަށް އެމްއެންޔޫގެ ބަޔާނުގައި ބުނެފައި ވެއެވެ.

މީގެ އިތުރުން ދަރިވަރުންނަށް ލިބިދޭންޖެހޭ ޢަމަލީ ތަޖުރިބާތައް ކުރިއެކޭވެސް އެއްގޮތަށް ދަރުމަވަންތަ ހޮސްޕިޓަލުން ފޯރުކޮށްދޭނެ ކަމަށްވެސް އެމްއެންޔޫއިން ވަނީ ބުނެފައެވެ.

އެމްއެންޔޫގެ ބަޔާނުގައި ބުނެފައި ވަނީ ޤައުމީ ޔުނިވަރސިޓީން އަބަދުވެސް ކަންތައްތައް އިންތިޒާމް ކުރަނީ ދަރިވަރުންގެ ކިޔެވުމަށް ބުރޫނާރާ ގޮތަށް، ކިޔެވުމުގެ ފެންވަރު ހިފެހެއްޓުމަށް އިސްކަންދީގެން ކަމަށެވެ. އަދި ދަރިވަރުންގެ ރައްކާތެރިކަމާ ލާބަ ކަށަވަރު ކުރުމަކީ އެ ޔުނިވަރސިޓީގެ އެންމެ އިސް ވާޖިބު ކަމަށެވެ.

މީގެ އިތުރުން ޙަޤީގަތާ ޚިލާފަށް ޢާންމުންގެ މަސްލަހަތު ގެއްލޭ ގޮތަށް ވާހަކަ ނުދެއްކުމަށް އެމްއެންޔޫއިން ވަނީ އިލްތިމާސްކޮށްފައެވެ.