ބޭންކް އޮފް މޯލްޑިވްސް (ބީއެމްއެލް)އިން ފާހަގަކޮށްލެވޭ މުވައްޒަފުންގެ އަގު ވަޒަންކޮށް އެ މުވައްޒަފުންނަށް އެވޯޑް ދީފިއެވެ.

ފާހަގަ ކޮށްލެވޭ މުވައްޒަފުންނަށް އެވޯޑު ދީފައިވަނީ ރޭ ކްރޮސްރޯޑުގައި ބޭއްވި، ބީއެމްއެލްގެ މުވައްޒަފުންގެ އަގުވަޒަން ކުރުމުގެ ގޮތުން ބާއްވާ އަހަރީ އިނާމު ދިނުމުގެ ހަފްލާގައެވެ.

މި ހަފްލާގައި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ކާލް ސްޓޫމްކޭ އަދި ޑިރެކްޓަރުންގެ ބޯޑާއި މެނޭޖްމަންޓުގެ މެންބަރުންވެސް ވަނީ ބައިވެރިވެލައްވާފައެވެ. 

ރޭގެ ހަފްލާގައި ބީއެމްއެލްގެ އެންމެ މޮޅު އަތޮޅު ގޮފި، އެންމެ މޮޅު އަތޮޅު މުވައްޒަފު، ކަސްޓަމާ ސާވިސް ސްޓާ، އަދި އެންމެ މޮޅު ޓީމަށްވެސް އެވޯޑް ދީފައިވެއެވެ. 

އަހަރުގެ އެންމެ މޮޅު މުވައްޒަފުގެ އެވޯޑު ހޯދާފައިވަނީ ކަސްޓަމާ ސާވިސް މެނޭޖަރު މުހައްމަދު ޝާއިގް އަހުމަދެވެ. ބެސްޓް ލީޑާ އެވޯޑް ލިބުނީ ހެޑް އޮފް ބިޒްނަސް އެންޑް އެސްއެމްއީ ބޭންކިން، އަލީ ފާރިޝް ޚަލީލަށެވެ. އަދި ޓާމިނަލް މެނޭޖްމަންޓް ޔުނިޓްގެ ބެސްޓް މެނޭޖަރުގެ އެވޯޑް ލިބުނީ އަޒާން ރަޝީދަށެވެ.

މީގެ އިތުރުން ކުންފުނީގެ ބްރާންޗުތަކަށް ދޭ ސީއީއޯގެ އެވޯޑް ފޯ އައުޓްސްޓޭންޑިން އެޗީވްމަންޓް ލިބުނީ ނައިފަރު ބްރާންޗަށެވެ.