ވިއެޓްނާމް ގައި ކޮރަޕްޝަނާ ދެކޮޅަށް ބޮޑު ކެމްޕޭނެއް ހިންގަމުންދާ ދަނޑިވަޅެއްގައި އެގައުމުގެ ގާނޫނު ހަދާ މަޖިލީހުގެ ރައީސް ވޫއޮންގް ދިން ހޫ މަގާމުން އިސްތިއުފާ ދެއްވައިފިއެވެ.
ވޫއޮންގް ދިން ހޫ މަގާމުން އިސްތިއުފާ ދެއްވީ އޭނާގެ މައްސަލަ ތަކެއް ހުރުމުން ކަމަށް ވިއެޓްނާމް ގެ ވެރިކަން ކުރާ ކޮމިއުނިސްޓް ޕާޓީން ބުނި ނަމަވެސް އެކަމުގެ ތަފްސީލެއް އެ ޕާޓީން ހާމަކޮށްފައެވެ ނުވެއެވެ. އަދި އެ ޕާޓީން ހޫގެ އިސްތިއުފާ ބަލައިގަންނަ ކަމަށާއި، ހޫ ގެ މި ނިންމުމާއި އެކު އެ ޕާޓީގައި އޭނާ އަދާކުރައްވަމުން ގެންދެވި އިސް މަގާމުން ވެސް ވަކި ކުރައްވާނެ ކަމަށް ވަނީ ބުނެފައެވެ.
އުމުރުފުޅުން 67 އަހަރުގެ ހޫ ވިއެޓްނާމް ގެ މަޖިލީހުގެ ޗެއާމަންކަމަށް 2021 ވަނަ އަހަރުގެ މާޗް މަހު އައްޔަނުކުރި އިރު، 2016 އިން 2020 ވަނަ އަހަރާއި ހިސާބަށް އޭނާ ވަނީ އެގައުމުގެ ބޮޑު ވަޒީރުކަން ވެސް އަދާކުރައްވާފައެވެ.
ވިއެޓްނާމް ގެ ގާނޫނު ހަދާ މަޖިލީހުން ހޫ އިސްތިއުފާ ދެއްވިއިރު، ގައުމީ މަޖިލީހުގެ އިދާރާގެ ޑެޕިއުޓީ ހެޑް އަދި ހޫގެ އެސިސްޓެންޓް ފަމް ތައި ހާ ވެސް ވަނީ މީގެ ހަތަރު ދުވަސް ކުރިން ހައްޔަރު ކޮށްފައެވެ.
ވިއެޓްނާމް ގައި "ބްލޭޒިންގ ފަރނަސް" ގެ ނަމުގައި 2016 ވަނަ އަހަރު ކޮރަޕްޝަނާއި ދެކޮޅަށް ފެށި ހަރަކާތް 2022 ވަނަ އަހަރުން ފެށިގެން އިތުރަށް ފުޅާވެ، އެ ހަރަކާތުގެ ތެރެއިން މިހާތަނަށް ދެ ރައީސަކާއި ދެ ބޮޑުވަޒީރަކު މަގާމުން ވަކިކޮށް، އެތައް ސަތޭކަ އޮފިޝަލުންތަކަކަށް ވަނީ އަދަބުދީ ނުވަތަ ޖަލަށް ލާފައެވެ.
އޭގެ ތެރޭގައި އެންމެ ދެ އަހަރު ވެރިކަން ކުރެއްވުމަށް ފަހު މިދިޔަ މާޗު މަހުގެ 21 ވަނަ ދުވަހު ވެރިކަމާއި ދުރުވުމަށް މަޖުބޫރުވި ވޯ ވެން ތޫއޮންގް ވެސް ހިމެނޭ އިރު، މިކަމާއި ގުޅިގެން ވަގުތީ ގޮތުން ރައީސް ގެ މަގާމުގައި ހުންނެވީ އެގައުމުގެ ނައިބު ރައީސާ ވޯ ތީ އަން ޝުއާންއެވެ.
Advertisement
This content is created and paid for by advertisers and does not involve Voice Journalists
