މުސްލިމުންނާއި ހަނގުރާމަ ކުރަމުންދާ ކާފަރުންނާއި މެދު މާތް ބަހުން ލިޔުމަކީ ހިތަށް ދަތިވާ މައްސަލައެއް ކަމަށް ޝައިޚް އަހްމަދު ސަމީރު ވިދާޅުވެއްޖެއެވެ.

ޔަހޫދީ މިނިސްޓަރެއް ގެ ކާރު ފުރުޅާލުމާއި ގުޅިގެން ލިޔެފައިވާ ހަބަރެއްގައި އެ ވަޒީރަށް މާތްބަހުން މުޚާތަބުކޮށް ސުރުހީ ލިޔެފައި އިނުމުން، އެކަން ފޭސްބުކް ގައި ހިއްސާ ކުރައްވާ ޝައިޚް ސަމީރު ވިދާޅުވީ، މިފަދައިން ދިވެހި ނޫސްތަކުން ފެންނާތީ ހިތަށް ވަރަަށް ތަދުވާ ކަމަށެވެ.

ޝައިޚް ސަމީރު ވިދާޅުވީ، ނޫސް ތަކުން މިފަދައިން ލިޔާ ސަބަބަކީ ވަޒީރުން ވީމާ ބަހުގެ ހަމަ އޮންނަނީ އެހެން ކަމަށް ވާތީކަމަށް ބުނާ އަޑު އިވުނު ނަމަވެސް ފުރަތަމަ ކަމަކީ ބަހުގެ ހަމައެއް އެހެން އޮތް ކަމަށް ވިޔަަަސް ޝަރުޢީ ހަމައިގެ މައްޗަކަށް ބަހުގެ ހަމަ އިސްނުކުރެވޭނެ ކަމަށެވެ.

އެގޮތުން ޝައިޚް ވިދާޅުވީ، ފިރުޢައުނާއި ޤާރޫނަކީވެސް ރަސްރަސްކަލުން ކަމަށާއި، ހާމާނަކީ ވެސް ވަޒީރަކަށް ވާއިރު، ފިރުޢައުނާއި ޤާރޫނު ވަޑައިގަންނަވާ ވާހަކައާއި ހާމާނު ދިރިއުޅުއްވާ ގަނޑުވަރުކޮޅުގެ ވާހަކަ ދިވެހި ލިޔުންތަކުގައި ނުހުންނަ ކަމަށެވެ. ހަމައެއާއިއެކު، ދިވެހި ތާރީހުގެ ތެރެއިން މިސާލުޖައްސަވައި ޝައިޚް ސަމީރު ވިދާޅުވީ އަނދިރި އަނދިރިންނަކީވެސް ހަމަ ވެރިއެއް ކަމަށާއި އޭނާގެ ވަޒީރުން ތިބި އިރު އެމީހުންނަަށް މުޚާތަބު ކުރެވެނީ މާތް ބަހުން  ނޫން ކަމަށެވެ.

ކާފަރު ވަޒީރަކަށް ރީތިބަހުން ލިޔުން މައްސަލައަކަށް ވަނީ ނޫން ކަމަށާއި، ހިތަށް ދަތިވާ މައްސަލައަކީ މުސްލިމުންނާ ހަނގުރާމަ ކުރަމުންދާ ކާފަރުންނާމެދު މާތް ބަހުން ލިޔުން ކަމަށް ޝައިޚް ސަމީރު ވިދާޅުވިއެވެ.