ވައިކަރަދޫ ފަޅުތެރޭ މުށިމަސްތައް މަރުވެ ކުނިވާ މައްސަލަ ހައްލުކުރުމަށް ކަމާ ބެހޭ ވުޒާރާތަކާ މަޝްވަރާ ކުރާނަނެކަމަށް މިނިސްޓަރ އޮފް ސިޓީސް، ލޯކަލް ގަވަރމެންޓް އެންޑް ވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.
ވަޒީރު ވިދާޅުވީ، ވައިކަރަދޫ ފަޅުތެރޭ މުށިމަސްތައް މަރުވާ މައްސަލައަށް ހައްލެއް ހޯދުމަށް ކައުންސިލާއި ސަރުކާރާ ގުޅިގެން ކުރައްވަމުން ގެންދަވާ މަސައްކަތްތަކާ ގުޅޭ ގޮތުން މައުލޫމާތު އެއްކުރައްވާފައި ވާކަމަށެވެ. އަދި މި މައްސަލަ ހައްލު ކުރުމަށް ކަމާބެހޭ ވުޒާރާތަކާ މަޝްވަރާ ކުރާނެކަމަށްވެސް ވަޒީރު ވިދާޅުވިއެވެ.
ހދ. ވައިކަރަދޫ ފަޅަކީ ޢާންމުކޮށްވެސް ގިނަ އަދަދެއްގެ މަސް ވަންނަ ފަޅެވެ. ޢާންމު ޙާލަތްތަކުގައި ފަޅަށް ފަތިިހު މަސްތައް ވަދެފައި އިރުއޮއްސެން ވާއިރަށް މަސްތައް ފަޅުތެރެއިން ނުކުމެއެވެ.
ނަމަވެސް ރޭ މަސްތައް ފަޅުތެރެއިން ނިކުންނަ ގަޑީގައި، ލޮނުގަނޑު އުފުލި މަސްތައް ފަޅުތެރޭގައި ތާށިވީއެވެ. އަދި އިރުއެރިއިރު ފަޅުތެރޭ އެތައް ހާސް މަހެއްވީ މަރުވެ ކުނިވެފައެވެ.
ވައިކަރަދޫ ކައުންސިލުން މައުލޫމާތު ދެއްވިގޮތުގައި ރަށު ޒުވާނުންނާއި ކައުންސިލް ގުޅިގެން ހެނދުނު މައްޗަށް އަރާފައިހުރި ބައި ވަނީ ސާފުކޮށްފައެވެ. އަދި މެންދުރު ފަހު އަނެއްކާ ވެސް އެކަމަށް ރަށު ރައްޔިތުންނަށް ގޮވާފައިވާ ކަމަށް ކައުންސިލުން މައުލޫމާތު ދެއެވެ.
Advertisement
This content is created and paid for by advertisers and does not involve Voice Journalists
