ޗައިނާގެ ސީ.އޭ.އެމް.ސީ އިންޖިނިއަރިންގ ކޮމްޕެނީ ލިމިޓަޑް ( ސީ.އޭ.އެމް.ސީ.އީ) އާއި ހަވާލުކޮށްގެން ލ. ގާދޫގައި ތަރައްޤީކުރާ "އިންޓަގްރޭޓަޑް މެރިޓައިމް ހަބް"ގެ ކޮންސެޕްޓްއާ ގުޅޭ ސަރވޭގެ މަސައްކަތްތައް ފަށައިފިއެވެ.
މި މަހުގެ 11 ވަނަ ދުވަހު އެ ކުންފުންޏާއި ހަވާލު ކުރި މި މަޝްރޫއު އަކީ މެރިޓައިމްއާ ގުޅުންހުރި ގިނަ ޚިދުމަތްތަކަކާއެކު ހައްދުންމަތީ ގާދޫގައި ތަރައްޤީކުރުމަށް ހަމަޖެހިފައިވާ މަޝްރޫއުއެކެވެ.
މި މަޝްރޫޢަށް ބޭނުންވާ ސަރވޭގެ މަސައްކަތްތައް އެމްޕީއެލްއާއި ސީ.އޭ.އެމް.ސީ.އީ އިންޖިނިއަރިންގ ކޮމްޕެނީގެ ޓީމުން ފަށާފައިވާއިރު، ދެ ކުންފުނީގެ ޓީމަކުން ވަނީ ގާދޫއަށްގޮސް އެކަމަށް ބޭނުންވާ މައުލޫމާތު އެއްކޮށްފައެވެ. އެގޮތުން މި ސަރވޭގައި ސީ.އޭ.އެމް.ސީ.އީ ކުންފުނިން 7 ތަޖުރިބާކާރުން ބައިވެރިވިއިރު، އެމް.ޕީ.އެލްގެ ޓެކްނިކަލް ޓީމެއްވެސް މި ސަރވޭގައި ވަނީ ބައިވެރިވެފައެވެ.
އެމް.ޕީ.އެލުން ބުނީ ލ. ގާދޫއަކީ ވެލާ ކަހަނބު ބިސްއަޅައިި، އަލާވާކަމަށް ފާހަގަކުރެވޭ ސަރަހައްދަކަށްވާތީ، މި މަޝްރޫޢު ކުރިއަށް ގެންދަން ނިންމާފައިވަނީ ތިމާވެއްޓާ ރައްޓެހި، އަދި ގާދޫގެ ގުދުރަތީ މުއްސަނދިކަން ހިމާޔަތްކުރެވޭ ކޮންސެޕްޓަކަށްކަމަށާއި މަޝްރޫޢުގެ ކޮންސެޕްޓްގެ މަސައްކަތްތައް ނިންމާލާނީ ތިމާވެއްޓާއި ބެހޭ ވުޒާރާއާއި އެންވަޔަރަންމަންޓަލް ޕްރޮޓެކްޝަން އޭޖެންސީގެ ފަންނީ ލަފަޔާއި އިރުޝާދު ހޯދުމަށްފަހުކަމަށެވެ.
މި މަޝްރޫޢު ކުރިއަށް ގެންދިއުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނޭކަމެއް ކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
