ދިގު މުއްދަތަކަށް ޚިދުމަތްކުރާ ސިފައިންނަށް ދޫކުރާ ގެދޮރު މިލްކުކޮށްދިނުމަށް ރައީސުލް ޖުމްހޫރިއްޔާ ޑރ.މުޙައްމަދު މުޢިއްޒު ނިންމާފައިވާ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ، މިއަދު ގިރިފުށީގައި ބޭއްވި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ 70 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.
"ސިފައިންގެ ޚިދުމަތުގެ ތެރެއިން ޤައުމަށް ޚިދުމަތްކުރަމުން ހަރުފަތަކަށް ފަހު ހަރުފަތެއް ގިރާކުރަމުން ރިޓަޔަރމަންޓް އޭޖާ ހަމައަށް އާދެވިއްޖަ ނަމަ ރިޓަޔާރ ކުރާނީ އަނބިދަރިންނާއި، ކާފާ މާމަ ކުދިންނާއެކީ އަބުރުވެރި ދިރިއުޅުމުއް އުޅޭވޭ ޙާލެއްގަ. އެކަން ކަށަވަރު ކޮށްދިނުމަށް ރައީސުލްޖުމްހޫރިއްޔާ ނިންމަވާފައި އޮތީ ސިފައިންގެ ތެރޭގަ ދިގުމުއްދަތަކަށް ޚިދުމަތްކުރާ ސިފައިންނަށް ގެދޮރުވެރިކަން މިލްކުވާނެ ގޮތެއް ހަމަޖައްސަވައިދެއްވަން"
ރަސްމިއްޔާތުގައި ޣައްސާން ވިދާޅުވިއެވެ.
ރަސްމިއްޔާތުގައިވާހަކަ ދައްކަވަމުން ޣައްސާން އިތުރަށް ވިދާޅުވީ ރައީސް މުއިއްޒުގެ ދުރު ވިސްނުންފުޅުގެ ދަށުން ސިފައިންގެ ވަޒިފާއަކީ ސުކޫލު ނިންމާފައި ޒުވާނުންނަށް ކުރިއަށް ދާން ފަހިކޮށްދެވޭ މަގެއް ކަމުގައި ހަދައިދެއްވަން މަސައްކަތް ކުރައްވާ ކަމަށެވެ.
"އެމަނިކުފާނުގެ ވިސްނުންފުޅުގައި އޮތީ ދިވެހިސިފައިންގެ ޚިދުމަތަކީ ޒުވަނުންނަށް ކެރިއަރ ޕާތެއްގެ ގޮތުގަ ހަމަޖައްސަވައިދެއްވުން. އޭގެ މާނައަކީ ތި ޒުވާނުންނެކޭ އެއްފަދައިން ސުކޫލް ދައުރު ނިންމަވާ އެހެން ޒުވާނުންވެސް ސިފައިންގެ ޚިދުމަތާ ގުޅިވަޑައިގެން އަސްކަރީ ނޫން ޤައުމަށް ފައިދާވާ އެހެން ދާއިރާތަކުން ވެސް، މިސާލަކަށް އިންޖިނޭރަކަށް ވާން ބޭނުން ކުއްޖެއް އިންޖީނެރިން ޑިގްރީއަށް، ޑޮކްޓަރަކަށްވާން ބޭނުން ކުއްޖެއް މެޑިސިން ހަދަން، ސްކޮކޮލާޝިޕްގެ ފުރުސަތުތައް ހޯދައިދެއްވުމުގެ މަސައްކަތް ރައީސުލްޖުމްހޫރިއްޔާ ވަނީ ފަށްޓަވާފައި."
ޣައްސާން ވިދާޅުވިއެވެ.
މީގެއިތުރުން މިއަދުގެ ރަސްމިއްޔާތުގައި ޣައްސާންވަނީ ލަޝްކަރު ބަލާ ފާސްކޮށް ދެއްވުމަށްފަހު، ކޯހުން ވަނަތައް ހާސިލުކުރި ދަރިވަރުންނަށް އިނާމް ހަވާލުކޮށްދެއްވާފައެވެ. ސިފައިންގެ 70 ވަނަ އަސާސީ ތަމްރީން ކޯހުން ޖުމުލަ 98 ދަރިވަރުން ދަސްވެނިވިއިރު ކޯހުން އެންމެ މޮޅު ދަރިވަރުގެ އެވޯޑް ހާސިލުކޮށްފައިވަނީ، ޕްރައިވެޓް ހަމްނާ ރަޝީދެވެ.
އެމްއެންޑީއެފް ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީސްއިން 2023 އޮކްޓޫބަރު 28 އިން ފެށިގެން ހިންގި މި ކޯހުގެ ތަމްރީނުތައް ކުރިއަށްގެންދިޔައީ ޅ.މާފިލާފުށީގައި ހުންނަ އެމްއެންޑީއެފް ދަ ބޭސިކް ސްކޫލުގައެވެ. މި ކޯހަކީ އަލަށް ސިފައިންގެ ޚިދުމަތާ ގުޅޭ މީހުންނަށް ސިފައިންގެ އެކި ދާއިރާތަކުގައި މަސައްކަތްކުރެވޭ ފެންވަރަށް ޢިލްމު އުނގަންނައިދީ، ތަމްރީނު ކުރުމަށް ހިންގޭ ކޯހެކެވެ.
Advertisement
This content is created and paid for by advertisers and does not involve Voice Journalists
