މެޑިސިން ކިޔަވާ ދަރިވަރުންގެ ކިޔެވުމަށް ހުރަސްއެޅޭ ފަދަ އެއްވެސް ކަމެއް ނުކުރައްވާނެކަމުގެ ޔަޤީންކަން ސަރުކާރުން ދެއްވާފައިވާކަމަށް މޯލްޑިވްސް ނެޝަނަލަް ޔުނިވާސިޓީ ސްޓޫޑެންޓް ޔޫނިއަން (އެމްއެންޔޫއެސްޔޫ) އިން ބުނެފިއެވެ.

މިރޭ އެމްއެންޔޫއެސްޔޫ އިން ނެރުނު ބަޔާނެއްގައި ވަނީ 26 އޭޕްރީލް ވީ ހުކުރު ދުވަހުގެ ރޭ 20:30 ގައި ރައީސުލްޖުމްހޫރިއްޔާގެ އޮފީހުގެ ކަމާބެހޭ އިސްވެރިންނާއެކު ބައްދަލުވުމެއް ބާއްވާފައިވާކަމަށާ މި ބައްދަލުވުމުގައި ސަރުކާރުން، މެޑިސިން ކިޔަވާ ދަރިވަރުންގެ ކިޔެވުމަށް ހުރަސްއެޅޭނެ ފަދަ އެއްވެސް ކަމެއް ނުކުރައްވާނެ ކަމުގެ ޔަޤީންކަން ދެއްވާފައިވާކަމަށެވެ.

އެގޮތުން ދަރިވަރުންގެ ތަޢުލީމީ ހައްޤުތައް ރައްކާތެރިކުރުމުގައި ރައީސުލްޖުމްހޫރިއްޔާ ދެއްވާ އިސްކަން ފާހަކަ ކުރައްވާ، މިހާރަށްވުރެ ފުރިހަމަ ފެސިލިޓީތައް ޤާއިމުކޮށްދެއްވާނެކަމުގެ ޔަޤީންކަން ދެއްވާފައިވާކަމަށްވެސް އެމްއެންޔޫއެސްޔޫގެ ބަޔާނުގައި ވެއެވެ.

އެމްއެންޔޫއެސްޔޫއިން ބުނި ގޮތުގައި މި ބައްދަލުވުމުގެ ސަބަބުން، ދާއިމީ ހިޔާވަހިކަމެއް ލިބެންދެން ދަރުމަވަންތަ ހޮސްޕިޓަލުގައި ތިބެވޭނެ ކަމަށް ކުރެވޭ އުންމީދު ވަނީ އާވެ ދަރިވަރުންނަށް ވަނީ ހިތްހަމަޖެހުމެއް ލިބިފައެވެ. 

ރޭ ބޭއްވި މި ބައްދަލުވުމުގައި ރައީސް އޮފީހުގެ އިސްވެރިންނާއި، އައިޖީއެމްއެޗުގެ އިސްވެރިން އަދި ޤައުމީ ޔުނިވާސިޓީގެ އިސްވެރިންވެސް ވަނީ ބައިވެރިވެ ލައްވާފައެވެ.

2018 ވަނަ އަހަރު ޤައުމީ ޔުނިވަރސިޓީގެ މެޑިކަލް ސްކޫލު ދަރުވަމަވަންތަ ހޮސްޕިޓަލުގައި ޤާއިމުކުރީ ވަގުތީ ގޮތުންނެވެ. މިހާރުވެސް ދަރުމަވަންތަ ހޮސްޕިޓަލުގައި ކިޔަވަމުންދާ ދަރިވަރުންގެ ކިޔެވުން މައި ކެމްޕަހަށް ބަދަލުކުރަން ނިންމާފައިވާތީ ވަރަށް ގިނަ ދަރިވަރުން ދަނީ ކަންބޮޑުވުން ފާޅުކުރަމުންނެވެ.