އއ.ހިމަންދޫގައި ފެނާއި ނަރުދަމާގެ ނިޒާމު ގާއިމު ކުރުމުގެ މަސައްކަތް ނިންމާލައިފި އެވެ.

މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އިން ވިދާޅުވީ ހިމަންދޫގައި ފެނާއި ނަރުދަމާ ނިޒާމު ޤާއިމު ކުރުމުގެ މަސައްކަތް އެއްކޮށް ނިމިފައިވާކަމަށެވެ. އެ ވުޒާރާއިން ހާމަކުރެއްވި ގޮތުގައި އެ މަސައްކަތް އެއްކޮށް ނިންމާލެވިފައިވަނީ މި މަހުގެ 24 ވަނަ ދުވަހުއެވެ.

ހިމަންދޫގައި ފެނާއި ނަރުދަމާ އެޅުމުގެ މަސައްކަތުގައި އެމްޑަބްލިއުއެސްސީ އާއި އެ މިނިސްޓްރީގެ ޓެކްނިކަލް ޓީމަކުން ބައިވެރިވެފައިވެ އެވެ.

މި މަޝްރޫޢަށް ޖުމުލަ 65,834,544.82 މިލިއަން ދިވެހި ރުފިޔާ އަރާފައިވާއިރު މި މަޝްރޫޢުގެ ދަށުން ހިމަންދޫގައި 6.35 ކިލޯ މީޓަރުގެ ފެން ހޮޅީގެ މައި ނެޓްވޯރކަކާއި 5.31 ކިލޯ މީޓަރުގެ ނަރުދަމާ މައި ނެޓްވޯކެއް ވަނީ ޤާއިމުކޮށްފައެވެ.

އަދި އާރްއޯ ފެސިލިޓީ ބިލްޑިންގ އިމާރާތް ކޮށް، ފެން އުފެއްދުމަށްޓަކައި 2 އާރ.އޯ ޕްލާންޓް ބެހެއްޓުމާއެކު، ފެން ރައްކާކުރުމަށްޓަކައި 3 ތާންގީ ބަހައްޓާފައިވެ އެވެ. މީގެ އިތުރުން، ގޭގޭގައި ފެންމީޓަރ ބަހައްޓައި، ފެނުގެ ކަނެކްޝަން ގުޅައިދީ، ގެތަކަށް ރައްކާތެރި ބޯފެން ފޯރުކޮށްދިނުމަށްވެސް ވަނީ ހަމަޖެހިފަ އެވެ.

މީގެ އިތުރުން މި މަޝްރޫޢުގެ ދަށުން ވަނީ 956 މީޓަރގެ ޕަންޕިން ލައިން އަޅާ، ނަރުދަމާގެ އިދާރީ ބިލްޑިންގ އިމާރާތް ކޮށް، 3 ޕަންޕިންގ ސްޓޭޝަނާއި އަދި 1 ސީ އައުޓް ފޯލް ޤާއިމުކޮށްފައެވެ. 

މި މަޝްރޫޢުގެ ދަށުން ފެނާއި ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ޖަނެރޭޓަރ ސެޓާއި ވެހިކަލް އަދި ފެން ތަޙުލީލު ކުރުމަށް ބޭނުންވާ ސާމާނު ވެސް ފޯރުކޮށްދިނުމަށް ވަނީ ހަމަޖެހިފަ އެވެ.