Advertisement
ހުރިހާ ބިދޭސީންގެ ފޮޓޯއާއި ފިންގަރޕްރިންޓް ނެގުމުގެ ޢަމަލީ މަސައްކަތް އަންނަ މަހު ފަށަނީ
ޤަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންގެ މައްސަލަ ހައްލުކުރުމުގެ ޢަމަލީ މަސައްކަތް އަންނަމަހު ފަށަން ހަމަޖެހިފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
ސަރުކާރުގެ މަސައްކަތްތަކާ ގުޅޭގޮތުން އެކި ވަޒީރުންނާއި ސުވާލުކުރުމަށް ޢާންމުންނަށް ހުޅުވާލައިގެން ކުރިއަށްގެންދާ "އަހާ" ފޯރަމުގައި ރައްޔިތަކު ކުރި ސުވާލަކަށް ޖަވާބުދެއްވަމުން ވަޒީރު އަލީ އިޙްސާން ވިދާޅުވީ، ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމުގެ މަސައްކަތް މިހާރުވެސް ފަށާފައިވާ ކަމަށާއި، މި މަސައްކަތުގެ ތެރެއިން ރާއްޖޭގައި އުޅޭ ހުރިހާ ބިދޭސީންގެ ފޮޓޯއާއި ދިހަ އިނގިލީގެ ފިންގަރޕްރިންޓް ނެގުމުގެ ޢަމަލީ މަސައްކަތް އަންނަ މެއި މަހު 2 ގައި ފަށަން ހަމަ ޖެހިފައިވާކަމަށެވެ.
މި މަސައްކަތް ކ. ހިންމަފުށިން ފަށަން ހަމަޖެހިފައިވާއިރު، ކުރިއަށް އޮތް މަހެއްހާ ދުވަސްތެރޭ ރާއްޖޭގެ ހުރިހާ ރަށެއްގައިވެސް މި މަސައްކަތް ފަށާ އަހަރެއްހާ ދުވަސްތެރޭ ރާއްޖޭގައި ތިބި ހުރިހާ ބިދޭސީންގެ އިނގިލީގެ ނިޝާން ނެގުމަށް ވަނީ ނިންމާފައެވެ. އަދި ކުރިއަށް އޮތް 3 އަހަރު ދުވަސްތެރޭ ޤަވާއިދާ ޚިލާފަށް އުޅޭ ބިދޭސީންގެ މައްސަލަ މުޅިން ހައްލުކުރުމަށް ނިންމާފައިވާކަމަށްވެސް ވަޒީރު ވިދާޅުވިއެވެ.
"އެއްފަހަރާ ފަށާނަން އަޅުގަނޑުމެން އިރާދަކުރެއްވިއްޔާ ހުރިހާ ރަށެއްގައި ކުރިއަށް އޮތް މަހެއްހާ ދުވަހުގެ ތެރޭގައި. ދާއިރު ކައުންސިލާއި ރަށު އޮފީހާ ގުޅިގެން، އެ ރަށެއްގައި ގަވައިދާ އެއްގޮތަށް ވެސް ގަވާއިދާ ހިލާފަށް ވެސް އުޅޭ މީހުންގެ ވެސް ޕިންގާ ޕްރިންޓް ނަގާފައި ފޮޓޯ ނަގާނެ"
އިހުސާން ވިދާޅުވި އެވެ.
މި މަސައްކަތުގެ ތެރެއިން ރާއްޖޭގައި އުޅެމުންދާ ބިދޭސީންގެ ފޮޓޮއާއި ފިންގަރ ޕްރިންޓު އެމީހުންގެ ވޯރކް ޕާމިޓާ ދިމާވޭތޯ ބަލާ، ޤަވާއިދާ ޚިލާފަށް އުޅޭ މީހުން ހޯދާ އެމީހުން ތިބީ ކޮންބައެއްގެ ބެލުމުގެ ދަށުގައިތޯ ބަލާނެ ކަމަށްވެސް ވަޒީރު ވިދާޅުވިއެވެ. ހަމަ އެހެންމެ ޤަވާއިދާ ޚިލާފަށް އުޅޭކަމަށް ފާހަގަކުރެވޭ ބިދޭސީން ޤަވާއިދުގެ ތެރެއަށް ވަނުމަށް ފުރުޞަތު ދީ، ފުރުޞަތުގެ ބޭނުން ނުހިފާނަމަ ޑީޕޯޓް ކުރާނެ ކަމަށާއި، އަދި އެއްވެސް ގޮތަކަށް ކާކުކަން އެނގޭފަދަ ލިޔެކިޔުމެއް ނެތް ފަރާތްތައް ދައުލަތުގެ ބެލުމުގެ ދަށަށް ގެނެސް އެކި އެމްބަސީތަކާ ގުޅިގެން ދެނެގަތުމަށް ފަހު، ޓްރެވަލް ޑޮކިއުމަންޓެއް ހަދައި އެމީހުން ވަގުތުން ޑީޕޯޓް ކުރެވޭނެ ކަމަށް ވެސް ވަޒީރު ވިދާޅުވިއެވެ.
މީގެ އިތުރުން، ރާއްޖޭގައި މި ވަގުތު ޤަވާއިދާ ޚިލާފަށް އުޅެނީ ކިހާ ބިދޭސީންނެއްކަން އެނގެން ނެތްކަން ހާމަ ކުރައްވާ މިރޭގެ ފޯރަމްގައި ވަޒީރު ވަނީ ކަންބޮޑުވުން ފާޅު ކުރައްވާފައެވެ.
"ބައެއް މީހުންނަކީ އައިޑެންޓިފިކޭޝަނެއް ވެސް ނެތް މީހުން. އޭނާގެ ޕާސްޕޯޓެއް ވެސް، އައިޑީ ކުރެވޭނެ އެއްވެސް ޑޮކިއުމަންޓެއް ވެސް ނެތް މީހުން. އެހެންވީމާ މިފަދަ މީހަކު އައިސް ތިމަންނާ އަކީ މިވެނި މީހެކޭ ބުންޏަސް އެކަން ވެރިފައި ކުރެވޭނެ ގޮތެއް ނެތް."
ވަޒީރު ވިދާޅުވިއެވެ.
ބިދޭސީން ގެންނަ ފަރާތުން އެހެން މީހެއްގެ ބެލުމުގެ ދަށަށް ބިދޭސީ މީހާ ބަދަލުކުރާނަމަ މަރުހަލާތައް އުނދަގޫވުމުގެ ސަބަބުން ގަވާއިދާ ޚިލާފަށް އެކަން ކުރާ ކަމަށް ވިދާޅުވެ ވަޒީރު ވަަނީ ރާއްޖެއެތެރެވާ ބިދޭސީންގެ މަޢުލޫމާތު ބެލެހެއްޓުމުގެ ކަންކަން ޒަމާނީ ޓެކްނޮލޮޖީގެ އެހީގައި މިހާރަށްވުރެ ހަރުދަނާކުރުމަށް މަސައްކަތްކުރައްވަމުން ދާކަންވެސް ފާހަގަކުރައްވާފައެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
