ޒަމާނަށް ފެތޭ ކޮންޓްރޯލް ޓެކްސީ ލައިންއެއް އުފެއްދުމުގެ މަސައްކަތް ފެށިފައިވާ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
ވަޒީރު އަމީން މިފަދައިން ވިދާޅުވީ، ރޭގައި ކުރިއަށް ދިޔަ "އަހާ" ފޯރަމްގައި ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ކަނޑައަޅައިފާ ފީއަށް ވުރެއް ބޮޑުކޮށް ޓެކްސީތަކުން ފީ ނަގަމުންދާތީ އެކަން ހައްލުކުރުމަށް އެ ވުޒާރާއިން އެއްވެސް މަސައްކަތްތަކެއް ކުރައްވަމުންދޭތޯ ރައްޔިތަކު ކުރި ސުވާލަށް ޖަވާބުދެއްވަމުންނެވެ.
މިގޮތުން ވަޒީރު އަމީން ވިދާޅުވީ، ޓެކްސީތަކުން ކަނޑައަޅައިފައިވާ އަގަށްވުރެ އިތުރަށް ފީ ނަގާކަމުގެ ކަންބޮޑުވުމާއި ޝަކުވާ އެ ވުޒާރާއަށްވެސް ހުށަހެޅޭކަމަށާއި އެއީ އެ ވުޒާރާގެ ސަމާލުކަމަށް އައިސްފައިވާ މައްސަލަ އެއް ކަމަށެވެ.
މި މައްސަލަ އަށް ހައްލެއް ގެނައުމަށްޓަކައި ޒަމާނަށް ފެތޭ ޓެކްސީ ލައިނެއް އުފެއްދުމަށް މަސައްކަތް ކުރަމުންދާ ކަމަށާއި، މި ޓެކްސީލައިން ފަރުމާ ކުރެވިގެންދާނީ އާރްޓީއެލްގެ ނިޒާމުގައި ބަސް ދުއްވާގޮތަށް ކަމަށް ވަޒީރު ވިދާޅުވިއެވެ.
"މިކަންތައް ހައްލުކުރުމަށްޓަކައި އަޅުގަނޑުމެން މިހާރު ކޮންޓްރޯލް ޓެކްސީ ލައިންއެއް އުފެއްދުމުގެ މަސައްކަތް ފެށިފައި މިއޮތީ. އެއީ ކެބިނެޓުން ނިންމަވައިގެން. މިއީ ޒަމާނަށް ފެތޭ ފަސިންޖަރުންނަށްވެސް އިތުބާރު ކުރެވޭ ކަމަކަށްވާނެ. އަޅުގަނޑުމެން އާރްޓީއެލްގެ ނިޒާމުގައި ބަސް ދުއްވާގޮތަށް، ޓެކްސީލައިނެއް ހެދިގެން ދިޔުމުން މި ގޮތަށް ދިގުލާފައިއޮތް މައްސަލަތައް ހައްލުވެގެން ދާނެކަމަށް ޤަބޫލުކުރެވޭ."
ވަޒީރު އަމީން ވިދާޅުވިއެވެ.
ވަޒީރު އަމީން ވިދާޅުވީ، ޓެކްސީ ލައިނުގައި މިހާރުވެސް ޓެކްސީ ކުރާ ފަރާތްތަކަށް މަސައްކަތް ކުރުމުގެ ފުރުޞަތު އޮންނާނެކަމަށާއި މި މަސައްކަތުގައި ބޭނުން ކުރާނީ ފިއުލްގެ ބަދަލުގައި ބެޓްރީ ޓެކްސީކަމަށެވެ.
މީގެއިތުރުން ވެސް ވަޒީރު އަމީން ވިދާޅުވީ، މިހާރު މި މަސައްކަތް ކުރުމަށް ޕޯޓަލެއްވެސް އުފައްދާއި ސްކޭން ޔުނިޓެއްވެސް ހެދިފައިވާކަމަށެވެ.
Advertisement
This content is created and paid for by advertisers and does not involve Voice Journalists
