ތުރުކީގެ އަސްކަރީ ބޯޓެއް ރާއްޖެއަށް ބަނދަރުކޮށްފިއެވެ.

އެމްއެންޑީއެފް އިން މިއަދު ވިދާޅުވީ، ދިވެހި ރާއްޖެއާ ތުރުކީއާ ދެމެދު ގުޅުން ހަރުދަނާކޮށް އެއްބާރުލުން އިތުރުކުރަމަށް، ހެޔޮއެދުމުގެ ދަތުރެއްގައި ތުރުކީގެ ކަނޑުމަތީ ސިފައިންގެ ބޯޓު ޓީ.ސީ.ޖީ ކިނާލިއަޑާއަށް ރާއްްޖެއިން ހޫނު މަރުހަބާއެއް ކިޔާފައިވާ ކަމަށެވެ.

މައުލޫމާތު ލިބޭ ގޮތުގައި މި އުޅަނދު ބަނދަރުކޮށްފައި އޮތީ މާލެ ސަރަހައްދުގައެވެ.

ޓީސީޖީ ކިނަލިއަޑާ އަކީ ތުރުކީގެ ކަނޑުމަތީ ސިފައިންގެ އެޑާ ކްލާސް އޭއެސްޑަބްލިއު ކޯވެޓްސްގެ ހަތަރު ވަނަ އުޅަނދެވެ. 

ޓީ.ސީ.ޖީ ކިނާލިއަޑާ ތުރުކީން ފުރާފައި ވަނީ މި މަހުގެ އަށް ވަނަ ދުވަހު، ގާތްގަނޑަކަށް ފަސް މަސް ދުވަހުގެ މުއްދަތަށް ދަތުރުކުރުމަށެވެ.

ޖަޕާނަށް ދަތުރުކުރަމުން ދާ މަގުމަތީގައި އެ ޓީ.ސީޖީ. ކިނާލިއަޑާ ސައުދީ ޢަރަބިއްޔާ އާއި ޖިބޫޓީގައިވެސް ވަނީ މަޑުޮށްފައެވެ.. އަދި މި ދަތުރުގައި ޖަޕާނަށް ދިޔުމުގެ ކުރިން ދިވެހިރާއްޖޭގެ އިތުރުން ސޯމާލިއާ، ބަންގްލަދޭޝް، މެލޭޝިއާ، އިންޑޮނޭޝިއާ، ތައިލެންޑް، ޗައިނާ އަދި ދެކުނު ކޮރެއާ އަށް ވެސް ޒިޔާރަތް ކުރުމަށް ވަނީ ހަމަޖެހިފައެވެ.

ޓީ.ސީ.ޖީ ކިނާލިއަޑާ އެނބުރި ތުރުކީއަށް ދާއިރު، ފިލިޕީންސް، ސިންގަޕޫރު، ސްރީލަންކާ، އިންޑިއާ، އޮމާން، ގަތަރު، ޔުނައިޓެޑް އަރަބް އެމިރޭޓްސް، ޕާކިސްތާން، ޖިބޫޓީ އަދި އުރުދުންގައި މަޑުކުރުމަށް ހަމަ ޖެހިފައިވާކަމަސް މައުލޫމާތު ލިބެއެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދަނީ ތުރުކީއާ ގުޅުން ބަދަހި ކުރުމަށް އެކިއެކި މަސައްކަތްތައް ކުއްވަމުންނެވެ. އެގޮތުން އެމަނިކުފާނު ވެރިކަމާ ހަވާލުވެވަޑައިގެން ރާއްޖެއިން ބޭރަށް ކުރެއްވި ފުރަތަމަ ރަސްމީ ދަތުރުފުޅު ކުރެއްވީ، ތުރުކީވިލާތަށްކަން ފާހަގަ ކޮށްލެވެއެވެ. އަދި ރާއްޖޭގެ ކަނޑުގެ ސަރަހައްދުތައް ބެލެހެއްޓުމަށް ޑްރޯން ހޯދައްވާފައިވަނީވެސް ތުރުކީއިންނެވެ.