ތިން ރަށެއްގެ ކައުންސިލުން ހުސްވެފައިވާ ގޮނޑިތަކަށް ކުރިމަތިލުމުގެ ފުރުސަތު އިލެކްޝަންސް ކޮމިޝަނުން ހުޅުވާލައިފިއެވެ.
އެގޮތުން ކުރިމަތިލުމަށް ހުޅުވާލާފައިވަނީ ކުޑަހުވަދޫ ކައުންސިލްގެ ރައީސްގެ މަޤާމަށާއި ގަމު ކައުންސިލްގެ މެންބަރުގެ ގޮނޑިއަށް އަދި މުލަކު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑި އަށެވެ.
އިލެކްޝަންސް ކޮމިޝަނުން ވިދާޅުވިގޮތުގައި މި ތިން ގޮނޑި ހުސްވެފައިވާތީ އެ ގޮނޑިތަކަށް މެންބަރުން އިންތިޚާބު ކުރުމަށް ބައި އިލެކްޝަން ބާއްވާނީ ޖޫން 15 ގައެވެ.
މި ބައި އިލެކްޝަންގައި ވާދަކުރަން 18 އަހަރު ފުރިފައިވާ ކޮންމެ ދިވެހި ރައްޔިތަކަށްވެސް ކުރިމަތިލެވޭނެއެވެ. އަދި ސާބިތު ދަރަންޏެއް އޮތް މީހެއްނަމަ އެ މީހާއަކީ ހުކުމާ އެއްގޮތަށް ދަރަނި ދައްކަމުންދާ މީހަކަށް ވާން ޖެހޭނެއެވެ. ލޯކަލް ކައުންސިލްތަކުގެ އިންތިޚާބުގެ ޤާނޫނު ބުނާ ގޮތުން އެ މަޤާމުތަކަށް ކުރިމަތިލާ މީހަކީ މައްޗަށް ޖިނާއީ ކުށެއް ސާބިތުވެ ހުކުމެއް ތަންފީޒު ކުރާ މީހަކަށް ވެގެން ނުވާނެއެވެ.
މީގެ އިތުރުން ބޭރު ޤައުމެއްގެ ރައްޔިތަކު ދިވެހި ރައްޔިތަކަށްވެފައިވާތާ 5 އަހަރުވެފައިވާނަމަ އެ މީހަކަށް ވެސް ކުރިމަތިލުމުގެ ފުރުސަތު އޮންނާނެއެވެ.
މި ތިން ރަށުގެ އިތުރުން، މ. މަޑުއްވަރީ ކައުންސިލް ރައީސް، ހއ. އުތީމު، ނ. ލަންދޫ، ނ. ވެލިދޫ ކައުންސިލް މެންބަރު އަދި ހއ. ތަކަންދޫ އާއި ރ. އިންނަމާދޫ ކައުންސިލްގެ އަންހެނުންނަށް ހާއްސަ ގޮނޑިއަށް މެންބަރުން އިންތިޚާބު ކުރުމަށް މެއި 4 ވަނަ ދުވަހު ބައި އިލެކްޝަން ބޭއްވުމަށް ވެސް އިލެކްޝަންސް ކޮމިޝަނުން ވަނީ ނިންމަވާފައެވެ.
Advertisement
This content is created and paid for by advertisers and does not involve Voice Journalists
