މާލޭގައި ފެންބޮޑުވުމުގެ މައްސަލަ ވަގުތީގޮތުން ހައްލުކުރުމަށް ސިފައިންނާއި ހަވާލުކޮށްފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

 ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އާދަމް ޝަރީފް ވިދާޅުވީ، މާލޭގެ މަގުތަކުގައި ފެންބޮޑުވާ މައްސަލަ ވަގުތީ ގޮތުން ހައްލުކުރަން ސިފައިންނާ ހަވާލުކޮށްފައިވާ ކަމަށާއި އެ މަސައްކަތް އަންނަ ހަފްތާގައި ނިމޭނެ ކަމަށް ލަފާ ކުރާ ކަމަށެވެ.

މި މަސައްކަތްކުރާއިރު ހާއްސަކޮށް މާފަންނުގެ މަގުތަކަށް ދޭނެ ކަން ފާހަގަކުރައްވަމުން ވަޒީރު ވިދާޅުވީ، މާލޭގެ މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް ލިބޭނީ ޗައިނާ ސަރުކާރުގެ ހިލޭ އެހީގެ ދަށުން ހިންގާ މަޝްރޫއުގެ ދަށުން މާލޭގެމަގުތައް ހަދާ ނިމުމުންކަމަށެވެ.

މީގެ އިތުރުންވެސް ވަޒީރު ވިދާޅުވީ،ރާއްޖެއަށް މިހަފްތާ ކުރީކޮޅު ކުރި ވިއްސާރައިގައި ރަށްރަށުގައި ވެސް ފެންބޮޑުވެ ގެއްލުންތައް ލިބިފައިވާކަމަށާއި، އެކަމާއި ގުޅިގެން ކައުންސިލް ތަކާއި އެކު މަސައްކަތް ކޮށްފައިވާއިރު،ވިދާޅުވީ ހެދުނު އެސެސްމެންޓްތަކުން އެއްކުރެވުނު މައުލޫމާތުގައި، ރަށްރަށުގައި ނަރުދަމާ އަޅާފައިވާ ގޮތުން ގޭގެއަށް ނަޖިސްވެސް ވަދެފައިވާކަން ފާހަގަކުރެވުނު ކަމަށެވެ.

އެހެންކަމުން ވަޒީރު އާދަމް ޝަރީފް އުމަރު ވަނީ ކުރިއަށް އޮތް ތަނުގައި މަޝްރޫއުތައް ހިންގާއިރު ސަރުކާރާއި މަސައްކަތް ކުރާ ފަރާތާ ދެމެދު މިފަދަ ކަންކަމާ މަޝްވަރާކޮށް އިސްކަން ދޭނެ ކަމުގެ ޔަގީންކަން ދެއްވާފައެވެ.