ޑރ.ރަމްޝާ ނިޔާވުމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ޑރ.ރަމްޝާ ނިޔާވުމާ ގުޅިގެން ތަޢުޒިޔާ ވިދާޅުވެ ރައީސް ޑރ.މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ ޚިދުމަތްތެރި ޑޮކްޓަރު ރަމްޝާ އަވަހާރަވި ޚަބަރު އެމަނިކުފާނު އަޑުއެއްސެވީ ފުން ހިތާމަޔާ އެކުގައި ކަމަށެވެ.
އަދި ޤައުމަށް ގެއްލިގެން އެދިޔައީ ކުޅިވަރުގެ މައިދާނުގައި ރީތި ނަމޫނާ ދެއްކެވި މޮޅު އެތުލީޓެއްކަމަށާއި، އިންސާނިއްޔަތަށް ޚިދުމަތް ކުރުމުގައި ރެޔާދުވާލު މަސައްކަތްކުރެއްވި ވާގިވެރިއެއް ކަމަށާއި އަދި ބަލިމީހުންނާއި ނުކުޅެދޭ މީހުންނަށް ހިތްވަރުދެއްވުމުގައި އޯގާތެރި އެހީތެރިއެއް ކަމަށްވެސް ރައީސް ޑރ. މުޢިއްޒު ކުރެއްވި ޕޯސްޓުގައި ވިދާޅުވިއެވެ.
އަދި މަރްޙޫމާ ޑރ. ރަމްޝާއަށް ﷲގެ ރުއްސެވުމާ، ފުއްސެވުމާ، ސުވަރުގޭގެ ދާޢިމީ ނިޢުމަތް މިންވަރުކުރައްވާ ޢާއިލާއަށް ކެތްތެރިކަން ދެއްވުމަށް އެދި ރައީސް ޑރ. މުޢިއްޒު ވަނީ ދުޢާ ކުރައްވާފައެވެ.
ކެންސަރަށް ފަަރުވާ ހޯއްދަވަމުން ގެންދަވަނިކޮށް ޑރ. ރަމްޝާ ނިޔާވެފައި ވަނީ މިއަދުގެ ވަގުތެއްގައެވެ. ޑރ. ރަމްޝާއަށް ކެންސަރު ޖެހިފައިވާކަން އެނގިފައިވަނީ އައިޖީއެމްއެޗްގެ އީއާރުގައި މަސައްކަތް ކުރެއްވުމަށްފަހު، އިތުރަށް ކިޔެވުމަށް ބެންކޮކުގައި ހުންނަވަނިކޮށް 2020 ވަނަ އަހަރުއެވެ. ނަމަވެސް ޑރ. ރަމްޝާ ވަނީ އޭނާގެ ކިޔެވުން ފުރިހަމަ ކުރައްވާފައެވެ.
ޑރ. ރަމްޝާ ވަނީ އައިޖީއެމްއެޗުގައި މެޑިކަލް އޮފިސަރެއްގެ މަޤާމު އަދާކުރައްވާފައެވެ. އަދި ޑރ. ރަމްޝާ ދިޔައީ ކެންސާ ސޮސައިޓީގެ ބޯޑު މެމްބަރުކަންވެސް ކުރައްވަމުންނެވެ. މީގެ އިތުރުން ޑރ. ރަމްޝާ ވަނީ ބެންކޮކުގެ ބައެއް ހޮސްޕިޓަލްތަކުގައި ވެސް މަސައްކަތް ކުރައްވާފައެވެ.
Advertisement
This content is created and paid for by advertisers and does not involve Voice Journalists
