އޮގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ)ގެ 15 ވަނަ އިސްލާމިކް ސަމިޓުގައި ބައިވެރިވެވަޑައިގަތުމަށް، އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ރަސްމީ ދަތުރުފުޅެއްގައި މިއަދު ގަމްބިއާ އަށް ފުރާވަޑައިގެންފިއެވެ.
ޑރ.ޝަހީމް މި ސަމިޓުގައި ބައިވެރިވުމަށް ވަޑައިގެންނެވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކަނޑައެޅުއްވި ޚާއްސަ މަންދޫބުގެ ގޮތުގައެވެ.
އޯ.އައި.ސީ އަކީ ހަތަރު ބައްރެއްގެ، 57 ޤައުމެއްގެ މެންބަރުކަން އޮންނަ، ދެވަނައަށް އެންމެ ބޮޑު ސަރުކާރުތަކުގެ މެދުގައި ހިންގާ ޖަމިއްޔާ އެވެ. އޯއައިސީން އިންތިޒާމްކޮށްގެން ބާއްވާ އިސްލާމިކް ސަމިޓަކީ، އެ ޖަލްސާގެ މެމްބަރުކަން އޮންނަ ގައުމުތަކުގެ ވެރިން ބައިވެރިވާ އެންމެ ބޮޑު ބައްދަލުވުމެވެ.
ކޮންމެ ތިން އަހަރަކުން އެއް އަހަރު، މި ބައްދަލުވުން ބާއްވަނީ އިސްލާމިކް ސަމިޓުން ސިޔާސަތު ނިންމުންތައް ނިންމައި، އޯއައިސީ ޗާޓަރުގައި ބަޔާންކޮށްފައިވާ ގޮތުގެ މަތިން މަގުސަދުތައް ހާސިލްކުރުމާ ގުޅޭ ހުރިހާ މައްސަލަތަކެއްގައި އިރުޝާދު ދީ، އިސްލާމީ އުންމަތް ކަންބޮޑުވާ އެހެން މައްސަލަތަކާ ބެހޭ ގޮތުން މަޝްވަރާކުރުމަށެވެ.
މި އަހަރު މި ސަމިޓް ބާއްވަން ހަމަޖެހިފައިވަނީ މިމަހުގެ 4 ވަނަ ދުވަހުން ފެށިގެން 5 ވަނަ ދުވަހުގެ ނިޔަލަށް ގެމްބިއާގެ ބަންޖުލްގައެވެ.
Advertisement
This content is created and paid for by advertisers and does not involve Voice Journalists
