އީޑީސް މަދިރީގެ ޒަރިއްޔާއިން ފެތުރޭ ބައްޔެއް ކަމަށްވާ ޑެންގީ ރާއްޖޭގައި ފެތުރޭ މިންވަރު އިތުރުވެ ހަލުއި ކަމާއިއެކު ފެތުރެމުންދާތީ، އެކަމަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން މިފަދައިން އިލްތިމާސްކޮށްފައިވާއިރު، ކުޑަކުދިންގެ ހާއްސަ ޑޮކްޓަރެއް ކަމަށްވާ އަހްމަދު ފައިސަލް އެކްސްގައި ކުރެއްވި ޕޯސްޓެއްގައި ވިދާޅުވީ، ޑެންގީ ހުން ޖެހިގެން 6 ކުއްޖަކު ބާއްވާފައިވާ ކަމަށާއި، އޭގެ ތެރެއިން ބައެއް ކުދިންގެ ހާލު ދެރަވެ ގަޔަށް ލޭވެސް އަޅަން ޖެހިފައިވާ ކަމަށެވެ.
ޑރ.ފައިސަލް ވަނީ މިއީ ފުރާނައަށް ނުރައްކާވާ ބައްޔެއްކަން ހަނދާން ނައްތާނުލުމަށާއި، މަދިރިން ރައްކާތެރިވުމަށް އިލްތިމާސް ކުރައްވާފައެވެ.
ކޮންމެ އަހަރެއްގެ ވިއްސާރަ މޫސުމާ ގުޅިގެން ޑެންގީ ފެތުރޭ މިންވަރު އިތުރުވާއިރު، މި އަހަރުގެ ވިއްސާރަ މޫސުން ދިގުލައިގެން ގޮސްފައިވާތީ، މަދިރި އާލާވުން ކުރިއަށް އޮތް ތަނުގައި ގިނަވާނެ ކަމަށް ބެލެވޭ ކަމަށް އެޗްޕީއޭއިން ވަނީ ބުނެފައެވެ. އަދި އެ އިދާރާއިން އަންނަނީ މި ބަލިން ރައްކާތެރިވުމުގެ ގޮތުން ފިޔަވަޅުތައް އެޅުމަށް ތަކުރާރުކޮށް އިލްތިމާސް ކުރަމުންނެވެ.
ސާފު ފެނުގައި އުފެދޭ އީޑީސް މަދިރީގެ ސަބަބުން ޖެހޭ މި ބަލި ޖެހުމުން ފެންނާނެ އަލާމާތްތަކުގެ ތެރޭގައި، ބޮލުގައި ރިއްސުމާއި، ހުން އައުމާއި، ހޮޑުލުމާއި ހުޅުތަކާއި މަސްތަކުގައި ރިއްސުން ހިމެނެއެވެ.
Advertisement
This content is created and paid for by advertisers and does not involve Voice Journalists
