މާލޭ އިންޑަސްޓްރިއަލް ވިލެޖް ސާފު ކުރުމުގެ މަސައްކަތުގެ ތެރެއިން، ވޭތުވެދިޔަ 3 ދުވަހުގެ ތެރޭގައި 928 ޓަނުގެ ކުނި ނަގާފައިވާ ކަމަށް ވޭސްޓް މެނޭޖްމެންޓް ކޯޕަރޭޝަން (ވެމްކޯ)އިން ބުނެފިއެވެ. 

ވެމްކޯއިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ މާލޭ އިންޑަސްޓްރިއަލް ވިލެޖު ސާފުކުރުމުގެ މަސައްކަތް ބާރު ދުވެއްޔެއްގައި ކުރިއަށް ދާ ކަމަށެވެ. އަދި ސާފުކުރުމުގެ ތެރެއިން މިހާތަނަށް 928 ޓަނުގެ ކުނިނަގާފައިވާ ކަމަށްވެސް ވެމްކޯގެ ޕޯސްޓުގައި ވެއެވެ. 

މީގެ އިތުރުން، އިންޑަސްޓްރިއަލް ވިލެޖު ސާފު ކުރުމުގެ މަސައްކަތް އަދިވެސް ކުރިއަށް ދާކަން ހާމަކުރައްވާ، މިހާތަނަށް ސާފުކުރެވުނު ސަރަހައްދުގެ ވީޑިއޯއެއް ވެމްކޯއިން ވަނީ ޢާންމުކޮށްފައެވެ.

އިންޑަސްޓްރިއަލް ވިލެޖް ސާފު ކުރުމުގެ މަސައްކަތް ފަށާފައިވަނީ، މާލެ ސިޓީ ކައުންސިލުން އިސްނަގައިގެން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއާއި، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއާއި، ވޭސްޓް މެނޭޖްމަންޓް ކޯޕަރޭޝަން ލިމިޓެޑު (ވެމްކޯ) އަދި، ދިވެހި ފުލުހުންގެ އިތުރުން މޯލްޑިވްސް ޕޯޓްސް ލިމިޓެޑާ ގުޅިގެން، މިދިޔަ ހޮނިހިރު ދުވަހެވެ.

އިންޑަސްޓްރިއަލް ވިލެޖު ސާފު ކުރުމުގެ މަސައްކަތް ފެށްޓެވުމަށް ފަހު ވެމްކޯއިން ވަނީ މިއީ ނުވަ މަސްދުވަހުގެ ތެރޭގައި އެތަން ސާފުކުރަން ޖެހުނު 3 ވަނަ ފަހަރުކަން ފާހަގަކޮށް، ޤަވާއިދާ ޚިލާފަށް އެތަނަށް ކުނި އަޅާ މީހުންނާމެދު ފިޔަވަޅު އަޅާނެކަމަށް ބުނެފައެވެ. އަދި ޤަވާއިދާ ޚިލާފަށް ހިންގާ އެފަދަ ޢަމަލުތައް ހުއްޓުވުމަށް އެންމެން ގުޅިގެން މަސައްކަތް ކުރުމަށް ވެމްކޯ އިން ވަނީ އިލްތިމާޒު ކުރައްވާފައެވެ.