ޤަވާއިދާ ޚިލާފަށް އުޅޭ ބިދޭސީންގެ ސަބަބުން ވަރަށް ސީރިޔަސް މައްސަލަތަކެއް ކުރިމަތިވަމުންދާ ކަމަށް މިނިސްޓަރ އޮފް ސްޓޭޓް ފޮރ ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލްއުސްތާޛު އަޙްމަދު ޞިއްދީޤު ވިދާޅުވެއްޖެއެވެ.
ރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ސްޓޭޓް މިނިސްޓަރ އަލްއުސްތާޛު އަޙްމަދު ޞިއްދީޤު ވިދާޅުވީ، ޤަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ ސަބަބުން، ދިވެހިންގެ އިތުރުން އެމީހުންނަށްވެސް ސީރިއަސް މައްސަލަތަކެއް ދިމާވާ ކަމަށެވެ.
އެގޮތުން ސިއްޙީ ޚިދުމަތްތައް ފަދަ އަސާސީ ޚިދުމަތްތައް ހޯދުމުގައި ވެސް ޤަވާއިދާ ޚިލާފަށް އުޅޭ ބިދޭސީންނަށް މައްސަލަތަކާ ދިމާވެ، އެ މީހުން ދަނީ އިތުރަށްވެސް ޤަވާއިދާ ޚިލާފު ކަންކަން ކުރަމުން ކަމަށް ސްޓޭޓް މިނިސްޓަރ ވިދާޅުވިއެވެ.
"ޤަވާއިދާ ޚިލާފަށް އުޅުމުން ނުކުން ނަތީޖާ ތަކެއް އެބަހުރި، ވަރަށް ސީރިއަސް މައްސަލަތަކެއް އެބަހުރި. މިސާލަކަށް ބުނާ ކަމުގަ ވަންޏާ ހޮސްޕިޓަލަށް ދައްކަން އޭނަ މިޖެހެނީ. އޭނައަކީ ވަރަށް ބޮޑު ބައްޔެއް ތަޙައްމަލު ކުރަމުންދާ މީހެއް. އޭނަ ހޮސްޕިޓަލަށް ދައްކަމުންދާއިރު އޭނާގެ އަތަކު ވޯކު ޕާމިޓެއް ނެތް. ދެން ޤަވާއިދާ ޚިލާފު މި ވަނީ މިކަމުގެ ތެރެއިންވެސް. ޤަވާއިދާ އެއްގޮތަށް އުޅޭ މީހެއްގެ ވަރކް ޕާމިޓު ހިފައިގެން ގޮސްފަ މެމޯ ހައްދާފަ، ޤަވާއިދާ ޚިލާފަށް އުޅޭ މީހާ މި ޑޮކްޓަރަށް ދައްކަނީ. ޤަވާއިދާ އެއްގޮތަށް އުޅޭ މީހާއަށް ލިބޭ ބޭސް، މި ބޭނުން ކުރަމުން ދަނީ ޤަވާއިދާ ޚިލާފަށް އުޅޭ މީހާ"
ސްޓޭޓް މިނިސްޓަރ އަލްއުސްތާޛު އަޙްމަދު ޞިއްދީޤު ވިދާޅުވިއެވެ.
ސްޓޭޓް މިނިސްޓަރ މިގޮތަށް ވާހަކަފުޅު ދައްކަވާފައިވަނީ، މިހާރު ކުރިއަށް ގެންދަމުންދާ އޮޕެރޭޝަން ކުރަނގީގެ ދަށުން، ޤަވާއިދާ ޚިލާފަށް އުޅޭ ބިދޭސީން، އަދި ހިފާ ހައްޔަރު ކުރުމުގެ ވިސްނުމެއް ނެތް ކަން ފާހަގަ ކުރައްވާ، މިހާރު ޤަވާއިދާ ޚިލާފަށް އުޅޭ ބިދޭސީން ޤަވާއިދުގެ ތެރެއަށް ވެއްދުމަށް މަސައްކަތް ކުރައްވާނެކަން ފާހަގަ ކުރައްވަމުންނެވެ.
ސްޓޭޓް މިނިސްޓަރު ވިދާޅުވީ، މުސާރަ ނުދިނުން ފަދަ މައްސަލަތައް ދިމާވެގެން، ރާއްޖޭގައި މަސައްކަތް ކުރާ ބިދޭސީ މީހާ، އޭނާ ރާއްޖެ ގެންނަ ފަރާތް ނޫން އެހެން ފަރާތެއް ކައިރީ މަސައްކަތް ކުރަން ފިލާ ކަމަށާއި، ދެ ފަރާތުންވެސް ބޭނުން ނަމަ، ބިދޭސީ މީހާ، އެކެއްގެ ބެލުމުގެ ދަށުން އަނެކެއްގެ ބެލުމުގެ ދަށަށް ބަދަލުކޮށް، ބިދޭސީ މީހާ ޤަވާއިދުގެ ތެރެއަށް ވެއްދުމަށް މަސައްކަތް ކުރާނެ ކަމަށެވެ.
މީގެ އިތުރުން ސްޓޭޓް މިނިސްޓަރު ވަނީ، ޤަވާއިދާ ޚިލާފަށް އުޅޭ ބިދޭސީންގެ ސަބަބުން، އެމީހުންގެ އެތައް ޙައްޤުތަކެއްވެސް ގެއްލޭކަން ފާހަގަ ކުރައްވާ، އޮޕެރޭޝަން ކުރަނގީގެ ދަށުން، ވަރަށް އަވަހަށް ރާއްޖޭގައި މިހާރު ބޮޑުވެފައިވާ ބިދޭސީންގެ މައްސަލަ ހައްލުކުރެވިގެން ދާނެކަމަށް ވިދާޅުވެފައެވެ.
އޮޕެރޭޝަން ކުރަނގި ގެ ނަމުގައި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީއިން މަޝްރޫޢެއް ފަށާފައިވަނީ މެއި މަހުގެ 2 ވަނަ ދުވަހުއެވެ. އެ ދުވަހު ހިންމަފުށީގައި ފެށި މަސައްކަތުގެ ތެރެއިން ގާތްގަނޑަކަށް 6 ގަޑިއިރުގެ ތެރޭގައި 164 ބިދޭސީންގެ މައުލޫމާތު ނެގިފައިވާކަމަށް ސްޓޭޓް މިނިސްޓަރު ވިދާޅުވިއެވެ.
އޮޕެރޭޝަން ކުރަނގީގައި މިހާރު ކުރިއަށް ގެންދާ މަރުޙަލާއަކީ، ބިދޭސީންގެ އިނގިލީގެ ނިޝާނާއި ފޮޓޯ ނަގާ، އެމީހުންނަކީ ކާކުކަން ހޯދުމެވެ. މި މަސައްކަތް ކުރުމަށް ކައުންސިލް ތަކާއި ޢާންމު ރައްޔިތުންގެވެސް އެއްބާރުލުން ނުހަނު ބޭނުންވާކަން ސްޓޭޓް މިނިސްޓަރ ވަނީ ހާމަކުރައްވާފައެވެ.
Advertisement
This content is created and paid for by advertisers and does not involve Voice Journalists
