އަހަރުގެ މިހާތަނަށް ޑެންގީ އާއި ޗިކުންގުންޔާ އާއި ގުޅޭ 900 ކޭސް ރިޕޯޓްކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ  (އެޗްޕީއޭ) ގެ ތަފާސް ހިސާބުތަކުން ދައްކައިފިއެވެ.

މީގެ ތެރެއިން ވެސް އެންމެ ގިނަ ކޭސްތައް ފެނިފައިވަނީ މާލެ ސަރަހައްދުން ކަމަށްވާއިރު، މި ފަހަކަށް އައިސް ރާއްޖޭގައި ޑެންގީ އާއި ޗިކުންގުންޔާ ޖެހޭ މީހުންގެ އަދަދު ވަނީ ވަރަށް ބޮޑަށް އިތުރުވެފައެވެ.

އެޗްޕީއޭގެ ތަފާސް ހިސާބުތަކުން ދައްކާގޮތުގައި  ޖެނުއަރީ އެކަކުން މެއި މަހުގެ ފުރަތަމަ ހަތްތާގެ ނިޔަލަށް ޑެންގީގެ 660 ކޭސް ރިޕޯޓްކޮށްފައިވާއިރު، އަހަރުގެ 14 ވަނަ ހަފްތާއިން ފެށިގެން ޑެންގޫގެ ކޭސްތައް ރިޕޯޓްކުރާ އަދަދު ވަނީ ވަރަށް ބޮޑަށް އިތުރުވެފައެވެ. 

1) ޖެނުއަރީ - 146 ކޭސް

2) ފެބްރުއަރީ - 116 ކޭސް

3) މާރޗް - 119 ކޭސް

4) އޭޕްރީލް - 239 ކޭސް

5) މެއި މަހުގެ 4 ވަނަ ދުވަހުގެ ނިޔަލަށް - 40 ކޭސް  

ޑެންގީ އާއިއެކު ޗިކުންގުންޔާ ގެ ކޭސްތައް ވެސް އިތުރުވެފައިވާއިރު،ޖެނުއަރީން ފެށިގެން މެއި 4ގެ ނިޔަލަށް 240 ކޭސް ރިޕޯޓްކޮށްފައިވާ ކަމަށް އެޗްޕީއޭގެ ތަފާސް ހިސާބުތަކުން ދައްކައެވެ. ނިމުނު ހަފްތާގައި އެކަނިވެސް ޗިކުންގުންޏާގެ 117 ކޭސް ވަނީ ރިޕޯޓްކޮށްފައެވެ.

1) މާރޗް – 5 ކޭސް

2) އޭޕްރީލް – 177 ކޭސް

3) މެއި މަހުގެ 4 ވަނަ ދުވަހުގެ ނިޔަލަށް – 58 ކޭސް

ކޮންމެ އަހަރެއްގެ ވިއްސާރަ މޫސުމާ ގުޅިގެން މަދިރިން ޖެހޭ ބަލިތައް ފެތުރޭ މިންވަރު އިތުރުވާއިރު، މި އަހަރުގެ ވިއްސާރަ މޫސުން ދިގުލައިގެން ގޮސްފައިވާތީ، މަދިރި އާލާވުން ކުރިއަށް އޮތް ތަނުގައި ގިނަވާނެ ކަމަށް ބެލެވޭ ކަމަށް އެޗްޕީއޭއިން ވަނީ ބުނެފައެވެ. އަދި އެ އިދާރާއިން އަންނަނީ މި ބަލިން ރައްކާތެރިވުމުގެ ގޮތުން ފިޔަވަޅުތައް އެޅުމަށް ތަކުރާރުކޮށް އިލްތިމާސް ކުރަމުންނެވެ.

 ސާފު ފެނުގައި އުފެދޭ އީޑީސް މަދިރީގެ ސަބަބުން ޖެހޭ މި ބަލިތައް ޖެހުމުން ފެންނާނެ އަލާމާތްތަކުގެ ތެރޭގައި، ބޮލުގައި ރިއްސުމާއި، ހުން އައުމާއި، ހޮޑުލުމާއި ހުޅުތަކާއި މަސްތަކުގައި ރިއްސުން ހިމެނެއެވެ.