އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗު) ގައި ވިހެއި ތުއްތު ކުއްޖަކަށް އެކަށީގެންނުވާ ގޮތްތަކަކަށް ފަރުވާދިން ކަމަށްބުނެ މީސްމީޑިޔާގައި ފަތުރަމުންދާ ވާހަކަތައް އައިޖީއެމްއެޗުން ދޮގުކޮށްފިއެވެ.

މިއަދު އައިޖީއެމްއެޗުން ނެރުނު ނޫސްބަޔާނެއްގައި ބުނެފައިވަނީ، އެ ހޮސްޕިޓަލުގައި ވިހެއި ތުއްތު ކުއްޖަކަށް ފަރުވާ ދިނުމުގައި އެކަށީގެންނުވާ ގޮތްތަކަކަށް އަމަލުކުރިކަމަށް ބުނެ ސޯޝަލްމީޑިއާ އަދި މެއިންސްޓްރީމް މީޑިއާގައި ހަގީގަތާ ޚިލާފަށް ދެކެވެމުންދާ ވާހަކައާ ބެހޭގޮތުން އެ ހޮސްޕިޓަލުން ހިތާމަކުރާކަމަށެވެ.

އައިޖީއެމްއެޗުގެ ބަޔާނުގައި ބުނެފައިވަނީ ބަލިމީހުންނަށް ފަރުވާދިނުމުގައި އެ ހޮސްޕިޓަލުން ޢަމަލުކުރަމުންދަނީ މެޑިކަލް ޕްރެކްޓިސްގައި ޢަމަލުކުރަމުން އަންނަ އުޞޫލުތަކާ އެއްގޮތަށް ކަމަށާއި މީސްމީޑިޔާގައި މީހެއްގެ ބަލި ޙާލަތާމެދު ވާހަކަތަކެއް ފެތުރުނު ނަމަވެސް ބަލިމީހާއާއި ފަރުވާގެ ތަފްޞީލުތަކަކީ ހޮސްޕިޓަލުން ހާމަކުރާނެ މައުލޫމާތުތަކެއް ނޫންކަމަށެވެ.

Advertisement

މީގެ އިތުރުން، މި މައްސަލައިގައި ވެސް ބޭހާއި ފަރުވާއާ ގުޅުން ހުރި ކަންކަން އާއިލާއާ މަޝްވަރާކޮށް ތަފްޞީލުތައް ކިޔައިދީފައި ވާނެކަމަށް އައިޖީއެމްއެޗުގެ ބަޔާނުގައި ވެއެވެ. އަދި ފަރުވާ ދޭ އިރު ހިތްހަމަ ނުޖެހޭގޮތަކަށް ކަންކަން ދާނަމަ އެކަން ކަން ސާފުކޮށް އޮޅުން ފިލުވޭނެ އިންތިޒާމުތައް ހޮސްޕިޓަލުގައިވެސް ހުރިކަން ފާހަގަކުރައްވާ، އެއަށްފަހުވެސް މައްސަލަ ހައްލުނުވެއްޖެ ނަމަ ހޮސްޕިޓަލުގެ ކަމާބެހޭ ފަރާތްތަކަށް ވަގުތުން މައްސަލަ ހުށަހެޅޭނެ އިންތިޒާމުތައްވެސް ހުރި ކަން އައިޖީއެމްއެޗުން ފާހަގަ ކުރައްވާފައިވެއެވެ. 

އައިޖީއެމްއެޗުން މިއަދު ނެރުނު ބަޔާނުގައި ވަނީ، ބޭސްފަރުވާ އާ މެދު ހިތްހަމަ ނުޖެހޭ ކަމެއް ދިމާވުމުން މީސްމީޑިޔާގައި ހަޤީގަތް އޮޅޭފަދަ ގޮތްގޮތަށް ވާހަކަ ނުދެއްކުމަށް އިލްތިމާޒު ކުރައްވާފައެވެ. އަދި ހޮސްޕިޓަލުގައި މަސައްކަތް ކުރައްވަމުންދާ ޑޮކްޓަރުންގެ ފޮޓޯ ޢާންމުކުރުންފަދަ، އެބޭފުޅުންގެ ޒިންމާތަކަށް ހުރަސްއެޅޭފަދަ ޢަމަލުތައް އެ ހޮސްޕިޓަލުން އެންމެ ހަރުކަށި އިބާރާތުން ކުށްވެރި ކުރާކަމަށާއި، އެ ފަދަ ޢަމަލުތައް ކުރާ ފަރާތްތަކާ މެދު ފިޔަވަޅު އަޅާނެކަމަށްވެސް އައިޖީއެމްއެޗުން ވަނީ ބުނެފައެވެ.