ސަރުކާރުގެ އަމާޒަކީ ތެލެސީމިއާ ކޮންޓްރޯލް ކުރުންކަމަށް ޞިއްޙަތާބެހޭ ވަޒީރު ޢަބްދުﷲ ޚަލީލް ވިދާޅުވެއްޖެއެވެ.
ބައިނަލްއަޤްވާމީ ތެލަސީމިއާ ދުވަހާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ވަޒީރު ޚަލީލް ވިދާޅުވީ، ބައިނަލްއަގުވާމީ ތެލަސީމިއާ ދުވަސް ފާހަގަކުރަމުންދާއިރު ތެލެސީމިއާ ތަހައްމަލު ކުރާ ހުރިހާ އެންމެންނަށް ހަމަހަމަ ކަމާއެކު ފެންވަރު ރަނގަޅު ފަރުވާއެއް ލިބެން ޖެހޭކަމަށެވެ.
ހަމައެއާއިއެކު ވަޒީރު ޚަލީލް ވިދާޅުވީ، ސަރުކާރުގެ އަމާޒަކީ ތެލަސީމިއާ ތަހައްމަލުކުރަމުންދާ ފަރާތްތަކަށް ހަމަހަމަކަމާއެކު، ފެންވަރު ރަނގަޅު ފަރުވާއެއް ފޯރުކޮށްދިނުންކަމަށާއި ސަރުކާރުން ވަޢުދުވެފައިވާ ފަދައިން ތެލަސީމިއާއިން މުޖުތަމަޢު ރައްކާތެރިކުރުން ކަމަށެވެ.
"އަޅުގަނޑުމެންގެ ސަރުކާރުގެ ވައުދުވެފައިވަނީ ތެލެސީމިއާ ހުއްޓުވުމުގެ އިތުރުން މެނޭޖްކޮށް، ތެލަސީމިއާ ތަހައްމަލު ކުރާ ކޮންމެ ފަރުދަކަށް ފެންވަރު ރަނގަޅު ސިއްހީ ފަރުވާގެ ހައްގު ކަށަވަރުކޮށްދިނުން."
ވަޒީރު ޚަލީލް ވިދާޅުވިއެވެ.
ތެލެސީމިއާ ޖެހޭ ކުދިންނަށް ފެންވަރު ރަނގަޅު ޞިއްޙީ ފަރުވާ ފޯރުކޮށްދިނުމަށާއި ތެލެސީމިއާ ބައްޔަށް ފަރުވާ ކުރާ ފަރާތްތަކަށާ ތެލެސީމިއާ އަށް ޓެސްޓު ކުރުމަށް ކުރަންޖެހޭ ކަންކަމަށް ގިނަ ލުއި ތަކެއް ހޯދައި ދެއްވުމަށް މި ސަރުކާރުން ދަނީ ވަރަށް ގިނަ މަސައްކަތްތަކެއް ކުރަމުންނެވެ. މިގޮތުން ތެލެސީމިއާ ބަލި ވާރުތަކުރާކަން ނުވަތަ ނޫންކަން ކަށަވަރުކުރުމަށް ހަދަން ޖެހޭ ޑީ.އެން.އޭ ޓެސްޓާއި، ތެލެސީމިއާ ކުދިން ހަދަންޖެހޭ އެމްއާރްއައި ޓީ2 ސްޓަރ ޓެސްޓަށް އާސަންދަ ދޫކުރަން ފެށުމާއި މެދުނުކެނޑިތެލެސީމިއާ ހުންނަ މީހުންނަށް ބޭނުންވާ ޑެސްފަރޯލާއި ބޭސް ފޯރުކޮށްދިނުމަށްޓަކައި ތެލަސީމިއާ ސެންޓަރުގައި އެސްޓީއޯގެ ފާމަސީއެއް ހުޅުވުމުގެ އިތުރުން ދައުލަތުގެ ހަރަދުގައި ބޯންމެރޯ ޓްރާންސްޕްލާންޓް ހަދައިދިނުމާއި އެ ޚިދުމަތަށް އެދިފައި ތިބި ހުރިހާ ކުދިންނަށްވެސް ކުރިއަށް އޮތް ތަނުގައި އެ މަގު ފަހި ކޮށްދިނުން ހިމެނެއެވެ.
Advertisement
This content is created and paid for by advertisers and does not involve Voice Journalists
