މިއަހަރުގެ ހައްޖަށް ފަހު ކިންގް ސަލްމާން ސެންޓަރު ހުޅުވޭތޯ މަސައްކަތްކުރަމުންދާ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
އިސްލާމީ ކަންތައްތަކާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ޝަހީމް ވިދާޅުވީ، ސަލްމާން މިސްކިތް ރަސްމީކޮށް ނުހުޅިވިނަމަވެސް ބޭނުންކުރާތާ ގިނަ ދުވަސްވެފައިވާކަމަށާއި މިސްކިތުގެ ފިނިކުރާ ނިޒާމް ބަލަހައްޓަން ޖެހޭ ވަރަށް ބަލަހައްޓާފައި ނެތުމުން މަރާމާތުކުރަން ޖެހިފައިވާކަމަށެވެ.
މިސްކިތުގެ ފިނިކުރާ ނިޒާމުގެ މައްސަލަ ހައްލުކުރުމަށް 6 މިލިއަން ރުފިޔާގެ ބަޖެޓެއް ބޭނުންވާއިރު މި ބަޖެޓް ހޯދުމުގެ ކަންކަން ސަރުކާރުން ކުރަމުން އަންނަ ކަމަށް ވަޒީރު ވިދާޅުވިއެވެ. އެއާއިއެކު މައްސަލަ ހައްލުކޮށް، ފިނިކުރާ ނިޒާމު ބެލެހެއްޓުމުގެ މަސައްކަތް ދިވެހި ބަޔަކާ ހަވާލުކުރުމުގެ ވިސްނުން ގެންގުޅުއްވާކަމަށް ވެސް ވަޒީރު ޝަހީމް ވަނީ ވިދާޅުވެފައެވެ.
"މި ސިސްޓަމް ރަނގަޅުކުރުމުގެ މަސައްކަތް މީގެ ކުރިންވެސް އެބަހުރި ބޭރުގެ ފަރާތްތަކަކާއެކު ކޮށްފައި. އެއީ ތުރުކީގެ އެތަން ހެދިއިރުވެސް ސިސްޓަމް ބެލެހެއްޓި ފަރާތްކަމުގައި މައުލޫމާތު ލިބިފައިއޮތީ. އަޅުގަނޑަށް އެންމެ ފަހުން މައުލުމާތު ލިބުނު ގޮތުގައި ރާއްޖޭގައި ވެސް އެބަތިބި މި ސިސްޓަމް ބެލެހެއްޓޭނެ ފެންވަރުގެ މީހުން. އެހެންވީމަ އަޅުގަނޑުމެން މިބަލަނީ ދިވެހިންނާ ހަވާލުކޮށްގެން މިކަންކަން ކުރިއަށްގެންދަން."
ވަޒީރު ޝަހީމް ވިދާޅުވިއެވެ.
ވަޒީރު ޝަހީމް ވިދާޅުވީ މަރާމާތުގެ މަސައްކަތްތަކަށްފަހު ޙައްޖު މަހުގެ ފަހުން ރަސްމީކޮށް ސަލްމާން މިސްކިތް ހުޅުވޭނެ ކަމަށާއި އެކަމަށްޓަކައި ސައުދީއަރަބިއްޔާގެ ފާހަގަކޮށްލެވޭ ޝަހުސިއްޔަތެއް ގެނައުމަށް މަޝްވަރާތައް ކުރެވެމުންދާ ކަމަށެވެ.
ދާދި ފަހުން ވަޒީރު ޝަހީމް ސައުދީއަރަބިއްޔާ އަށް ކުރެއްވި ދަތުރުފުޅުގައި ވެސް ކިންގް ސަލްމާން މިސްކިތް ރަސްމީކޮށް ހުޅުވުމާއި ގުޅޭގޮތުން ވަނީ މަޝްވަރާކުރައްވާފައެވެ.
Advertisement
This content is created and paid for by advertisers and does not involve Voice Journalists
