އަމިއްލަ ކުންފުންޏަކުން ރާއްޖެ ގެނެސްފައިވާ ބިދޭސީންގެ ޑިޕޮސިޓްގެ ގޮތުގައި ދައްކާފައިވާ ފައިސާގެ ރިފަންޑްގެ ގޮތުގައި 88،073.90 ރުފިޔާ ދެއްކުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ މައްޗަށް ސިވިލް ކޯޓުން ޙުކުމް ކޮށްފިއެވެ.

ގްލޯ ޓުއަރސް ނަމަކަށް ކިޔާ އަމިއްލަ ކުންފުންޏަކުން މިނިސްޓްރީއާ ދެކޮޅަށް ދައުވާކޮށްފައިވަނީ، އެ ކުންފުނިން ރާއްޖެ ގެނެސްފައިފާ ބިދޭސީންގެ ޑިޕޮސިޓްގެ ގޮތުގައި ދައްކާފައިވާ ފައިސާ ރިފަންޑް ކޮށްދިނުމަށްޓަކައި، މިނިސްޓްރީ އޮފް އިކޮނޮމިކް ޑިވެލޮޕްމަންޓްއިން ކޮށްފައިވާ އިއުލާނާއި އެއްގޮތަށް އެ ކުންފުނިން ރުފިޔާގެ ޑިޕޮސިޓް ސްލިޕްތައް ހުށަހެޅުމުން، ރިފަންޑް ފައިސާ ހަވާލުކޮށްފައި ނުވާތީއެވެ.

އެގޮތުން އެކުންފުނިން ރިފަންޑަށް އެދި ހުށަހެޅި 363،750 ރުފިޔާއާއި، ކޯޓު މެދުވެރިކޮށް އެ ފައިސާ ހޯދުމަށް ވަކީލުންނަށް ޚަރަދުކުރަން ޖެހުނު 45،000 ރުފިޔާއާއެކު ޖުމްލަ 408،750 ރުފިޔާ މިނިސްޓްރީ ގެ ފަރާތުން ހޯދުމަށް ގްލޯ ޓުއަރސް އިން ދައުވާކޮށްފައި ވެއެވެ. 

Advertisement

ނަމަވެސް ކޯޓުން ޙުކުމް ކޮށްފައިވަނީ މި މައްސަލައާ ގުޅިގެން 88،073.90 ރުފިޔާ ދެއްކުމަށެވެ. އެއީ ގްލޯ ޓުއަރސްގެ ފަރާތުން 105 ބިދޭސީންގެ ޑިޕޮސިޓްގެ ރިފަންޑް ހޯދުމަށް ހުށަހަޅާފައިވާއިރު، އޭގެ ތެރެއިން ރިފަންޑް ކުރުމުގެ ޝަރުތު ހަމަވަނީ 52 ބިދޭސީން ކަމުގައިވާތީއެވެ. އަދި ގްލޯ ޓުއަރސްއިން ހުށަހަޅާފައިވާ ލިސްޓުގައި ހިމެނޭ 60 ބިދޭސީންގެ ތެރެއިން 23 ފަރާތެއް ރިފަންޑް ހޯދުމަށް ހުށަހަޅާފައި ނުވާތީ، ބާކީ ތިބި 37 ބިދޭސީންގެ ތެރެއިން، 12 ބިދޭސީން އުނިކުރުމަށް އެ ކުންފުނިން ހުށަހެޅުމުން، ބާކީ ޝަރުތު ހަމަވާ ތިބީ 25 ފަރާތް ކަމުގައިވާތީއެވެ.

މީގެ އިތުރުން ކޯޓުން ޙުކުމްކޮށްފައިވަނީ ގްލޯ ޓުއަރސްގެ ފަރާތުން ހުށަހަޅާފައިވާ ގިނަ ވާޤިއާތައް މި މައްސަލާގައި ސާބިތުވެފައި ނުވާތީއާއި، އެފަރާތުން ދައުވާ ހުށަހެޅި ގޮތަށް ބަދަލު ގެނެސްފައިވާތީއާއި އެ ފަރާތުން އެދިފައިވާ ފަރުވާ ފުރިހަމައަށް މި މައްސަލާގެ ތެރެއިން ހޯދައިނުދެވޭތީ މަދަނީ އިޖުރާއަތުގެ ޤާނޫނުގެ ދަށުން، ވަކީލުގެ ފީގެ ގޮތުގައި ހޯދުމަށް އެދުނު ފައިސާ ނަގައިދެވެން ނެތްކަމަށެވެ.

އެހެން ކަމުން، ސިވިލް ކޯޓުގެ ގާޒީ އަބްދުﷲ އިހުސާން ކުރެއްވި ހުކުމުގައި ވަނީ 7 މެއި 2024 އިން ފެށިގެން 30 ދުވަހުގެ ތެރޭގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ފަރާތުންޖު މުލަ 88،073.90 ރުފިޔާ ގްލޯ ޓުއާރސް އެނޑް ޓްރޭޑް ޕްރައިވެޓް ލިިމިޓެޑް އަށް ދިނުމަށެވެ.