ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލުމުގައި ބައިވެރިވި މައްސަލައިގައި ދައުލަތުން ދައުވާ އުފުލި ، އދ. މާމިގިލީ ސޭޑީގްރޯވް، އިބްރާހިމް ސައްމާހު އަހުމަދު ގެ މައްޗަށް ކުށް ސާބިތު ނުވާ ކަމަށް ކުރިމިނަލް ކޯޓުން ހުކުމް ކޮށް، އޭނާ ބަންދުން ދޫވެފައިވަނިކޮށް، އޭނާގެ މައްޗަށް ހައި ކޯޓުގައި ހިންގާ އިސްތިއުނާފުގެ ޝަރީއަތް ނިމެންދެން ބަންދުކުރަން ސުޕްރީމް ކޯޓުން އަމުރުކޮށްފި އެވެ.

މީގެ ހަތް އަހަރު ކުރިން މޫސަ މަރާލި މައްސަލާގައި، ސައްމާހުގެ މައްޗަށް ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާ އުފުލި ނަމަވެސް މި އަހަރުގެ ޖެނުއަރީ މަހުގެ 23 ވަނަ ދުވަހު ކްރިމިނަލް ކޯޓުން ވަނީ ސައްމާހުގެ މައްޗަށް ކުށް ސާބިތުނުވާ ކަމަށް ހުކުމްކޮށްފައެވެ.

އެއާއިއެކު، ދައުލަތުން އެ ހުކުމް ހައި ކޯޓުގައި އިސްތިއުނާފުކޮށް، އިސްތިއުނާފުގެ ޝަރީއަތް ނިމެންދެން ބަންދު ކުރުމަށް އެދުނު ނަމަވެސް، ހައި ކޯޓުން ބަންދުގެ އަމުރެއް ނެރެނުދިނުމުން ދައުލަތުން ވަނީ ހައި ކޯޓުގެ ނިންމުން ސުޕްރީމް ކޯޓުގައި އިސްތިއުނާފު ކޮށްފައެވެ.

Advertisement

އެއާއިއެކު ސުޕްރީމް ކޯޓުން މިއަދު މައްސަލަ ބެއްލެވި ތިން ފަޑިޔާރުން ކަމަށްވާ ފަނޑިޔާރު އަލީ ރަޝީދު ހުސައިނާއި ފަނޑިޔާރު މަހާޒު އަލީ ޒާހިރާއި ފަނޑިޔާރު ޑރ. މުހައްމަދު އިބްރާހީމް ގެ އިއްތިފާގުން މި އަމުރު ނެރުނު އިރު، އެ ކޯޓުން ބުނީ އޭނާއާ ދެކޮޅަށް ތުހުމަތު ކުރެވޭ ވަރުގެ ހެކި ހުރި ކަމަށް ދައުލަތުން ބުނެފައިވާ ކަމަށާއި، ހައި ކޯޓުން އެ ކަމަށް ރިއާޔަތް ކޮށްފައި ނުވާ އިރު، ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދުގެ ބައެއް މަރުހަލާތައް ފުރިހަމަނުވާ ކަމަށެވެ.

މޫސަގެ މަރުގެ މައްސަލައިގައި ދައުލަތުން ޖުމްލަ ތިން މީހެއްގެ މައްޗަށް ދައުވާ އުފުލި އިރު، އޭގެ ތެރެއިން ކުށް ސާބިތުވީ ހަމައެކަނި ސ. ހިތަދޫ މުޑުދާސްގޭ އަލީ ހަސަން ގެ މައްޗަށެވެ. އެއާއިއެކު އޭނާގެ މައްޗަށް ވަނީ 15 އަހަރުގެ ޖަލު ހުކުމެއް އިއްވާފައެވެ.

ދެން ދައުލަތުން ދައުވާ އުފުލާފައިވަނީ ނ. ޅޮހީ ކަނީރުމާގެ، މުޙައްމަދު ރިޔާޟްއާއި، މ.ދިއްގަރު ދެބުދާރުގޭ އަޙްމަދު އިޖާދު މުޙައްމަދުގެ މައްޗަށެވެ. މީގެ އިތުރުންވެސް، މި މައްސަލައާއި ގުޅިގެން ސ. ހިތަދޫ ގުލްބަކާގޭ މުޙައްމަދު ނާޒިޝް ނާޒިމްގެ މައްޗަށް ދައުލަތުން މަގްބޫލު ސަބަބެއްނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާ އާއި މީހަކަށް ނުރައްކާތެރި ހާނީއްކައެއްވާގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ދައުވާ ވެސް ދައުލަތުން ވަނީ އުފުލާފައެވެ.

ސެޕްޓެމްބަރު 24، 2017 ވަނަ ދުވަހު ހިނގި މި މާރާމާރީގައި ލިބުނު ޒަހަމްތަކާއި ގުޅިގެން މޫސާ ހޮސްޕިޓަލަށް ގެނައިތާ ކުޑައިރުކޮޅެއްގެ ތެރޭގައި ވަނީ ނިޔާވެފަ އެވެ.