އަދުގެ ސަރުކާރު ހިންގަން ތިބީ ދިވެހިރާއްޖޭގައި ތިބި އިންޑިޔާ ސިފައިން ބޭލުމަށް މަސައްކަތްކޮށް އަނިޔާ ލިބުނު މީހުން ކަމަށް ވިލިމާލޭ ދާއިރާގެ އިންތިޚާބީ މެންބަރު މުހައްމަދު އިސްމާއީލް ވިދާޅުވެއްޖެއެވެ.

ދިވެހިރާއްޖޭގައި ހުރިހާ އިންޑިޔާ ސިފައިން މިހާރު ރާއްޖެއިން ފައިބައިވާ ކަމަށް މިމަހު 9 ވަނަ ދުވަހު ސަރުކާރުން ވަނީ ހާމަކޮށްފައެވެ. އެ ސިފައިންގެ ބަދަލު މިހާރު ތިބީ މަދަނީ މީހުން ކަމަށްވެސް އިންޑިޔާއާއި ސަރުކާރުންވެސް ބުނެފައިވެއެވެ. 

އެކަމާއި ގުޅިގެން ކުރީގެ ހޯމް މިނިސްޓަރު އުމަރު ނަސީރު މީސްމީޑިއާގައި ކުރެއްވި ޕޯސްޓެއްގައިވަނީ، ރާއްޖޭގައި ތިބި އިންޑިއާގެ އަސްކަރީ ސިފައިން ރާއްޖެ ދޫކޮށް ދިޔަ ކަމަށް ބުނާ ވާހަކަތަކަކީ މުޅިން ވެސް ދޮގު ވާހަކަތަކެއް ކަމަށް ވިދާޅުވެފައެވެ. 

"އިންޑިއާގެ އަސްކަރީ ސިފައިން ވަރަށް ބޮޑަށް މިތާ އެބައޮތް. އިންޑިއާގެ ކަނޑުގެ ސިފައިންގެ ހެލިކޮޕްޓަރުތަކާއި، ޑޯނިއާ މަތިންދާ ބޯޓަކާއި، ރާޑަ ސްޓޭޝަންތަކާއި، ނޭވަލްގެ މުވައްޒަފުން މިތަނުގައި އެބަތިބި،" މިދިޔަ ރިޔާސީ އިންތިހާބުގެ ފުރަތަމަ ބުރުގައި ރައީސް ޑރ. މުއިއްޒުއާ ވާދަކުރެއްވި އުމަރު ވިދާޅުވި އެވެ.

އުމަރު ނަސީރުގެ އެ ވާހަކަތަކަށް ރައްދު ދެއްވައި މުހައްމަދު އިސްމާއީލް އެކްސްގައި ކުރެއްވި ޕޯސްޓެއްގައި، އުމަރު ނަސީރު އެފަދައިން ވިދާޅުވެ ނޫސްތަކުގެ ފަލަ ސުރުހީ ހައްދަވާއިރު، އޭނާ އަކީ ދިވެހިރާއްޖޭގައި އިންޑިޔާ ސިފައިން ތިބެގެން “ތިމާމެންގެ ގަމީހަށް ރުލެއް އަރުވާ ނުލާ” ބޭފުޅެއް ކަމަށެވެ.

މިއާއެކު މުހައްމަދު ވިދާޅުވީ، ރައީސް ޑޮކްޓަރ މުހައްމަދު މުއިއްޒު ވިދާޅުވެލައްވާ ގޮތައް ކަންކަން ކުރަށްވަމުން ގެންދަވާތަން ސާފުކޮން ފެންނަމުންދާ ކަމަށާ އޭގެ ސަބަބުން ދިވެހި ރައްޔިތުންގެ އިތުބާރާ ލޯބި އެމަނިކުފާމަށް އިތުރުވަމުންދާ ކަމަށެވެ.