ފައިލޭރިއާ ޖެހިފައިވާ ބިދޭސިންތަކެއް އަނެއްކާވެސް ފެނިއްޖެއެވެ.
މިފްކޯގެ މީޑިއާ އޮފިޝަލެއް ވިދާޅުވިގޮތުގައި، ގއ. ކޫއްޑޫ މަސް ފެކްޓަރީގައި މަސައްކަތް ކުރަމުންދިޔަ ބިދޭސީން މިދިޔަ ބުރާސްފަތި ދުވަހު ސްކްރީން ކުރުމުން، ތިން ބިދޭސީއަކު ވަނީ ފައިލޭރިއާއަށް ޕޮޒިޓިވް ވެފައެވެ.
ފައިލޭރިއާއަށް ޕޮސިޓިވް ވި ތިން މީހުންނަކީވެސް އިންޑިއާއަށް ނިސްބަތްވާ ބިދޭސީންނެވެ. މިހާރު އެ ތިން މީހުންނަށްވެސް ވަނީ ގއ. ވިލިނގިލީގައި ހުންނަ އަތޮޅު ހޮސްޕިޓަލުން ފަރުވާ ދީފައިކަމަށާއި، ތިން މީހުންވެސް ފަރުވާއަށްފަހު މަސައްކަތަށް ނުކުމެފައިވާކަމަށް މިފްކޯގެ އޮފިޝަލް މައުލޫމާތު ދެއްވައެވެ.
ދިވެހިރާއްޖެއަކީ 2016 ވަނަ އަހަރު، ފައިލޭރިއާ ނައްތާލާފައިވާކަމަށް ޑަބްލިއުއެޗްއޯއިން ކަނޑއަޅާފައިވާ ޤައުމެކެވެ. ނަމަވެސް، މިދިޔަ އަހަރުގެ ޑިސެމްބަރު މަހު ހދ. ކުޅުދުއްފުށީގައި ހެދި ރެންޑަމް ސްކްރީނިންއަކުން ވަނީ ފައިލޭރިއާ ޖެހިފައި ތިބި ބިދޭސީންތަކެއް ފެނިފައެވެ.
ދިވެހިރާއްޖޭގައި މިހާރު ފައިލޭރިއާ ހުރި ވަރު ބެލުމަށް އެޗްޕީއޭއިން ވަނީ ސްކްރީނިން ޕްރޮގްރާމެއް ހިންގުމަށް ނިންމާފައެވެ. އަދި އެޗްޕީއޭ އިން ވިދާޅުވިގޮތުގައި ފައިލޭރިއާ އާ ގުޅޭ ސާވޭއެއްވެސް މިހާރު ދަނީ ކުރިއަށް ގެންދަމުންނެވެ. ނަމަވެސް ސާވޭގެ ތަފްސީލު ހާމަކުރާނީ ސާވޭ އެއްކޮށް ނިމުމުން ކަމަށްވެސް އެހްޕީއޭއިން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
