އިނގިރޭސިވިލާތުގެ މިނިސްޓަރ އޮފް ސްޓޭޓް ފޯ ދަ އިންޑޯ ޕެސިފިކް، އޭން މެރީ ޓްރެވެލިއަން ދިވެހިރާއްޖެއަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ.

ދިވެހިރާއްޖެއަށް ކުރެއްވި ދަތުރުފުޅު ނިންމަވާލެއްވިކަން ހާމަ ކުރައްވާ ވަޒީރު ޓްރެވެލިއަން އެކްސްގައި ކުރެއްވި ޕޯސްޓެއްގަިއ ވިދާޅުވީ، މި ދަތުރުފުޅަކީ ވަރަށް އުފެއްދުންތެރި، ދަތުރުފުޅެއް ކަމަށާއި، ދިވެހިރާއްޖެއާއި އިނގިރޭސިވިލާތާ ދެމެދު ގުޅުން ބަދަހި ކުރުމަށް މަޝްވަރާކުރެއްވި ކަމަށެވެ.

މި ދަތުރުފުޅުގައި ވަޒީރު ޓްރެވެލިއަން ވަނީ ދިވެހިރާއްޖޭގެ ނައިބު ރައީސް އަލްއުސްތާޛު ހުސައިން މުޙައްމަދު ލަޠީފާއި، މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިގު އިބްރާހީމާއި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން، އަދި މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދާ ބައްދަލުކުރައްވާ މަޝްވަރާ ކުރައްވާފައެވެ.

Advertisement

އިނގިރޭސި ވިލާތުގެ ފޮރިން، ކޮމަންވެލްތު އެންޑް ޑިވެލޮޕްމަންޓް އޮފީހުން ހާމަކުރެއްވިގޮތުގައި، ދިވެހި ވަޒީރުންނާ ބައްދަލުކުރައްވާ، ވަޒީރު ޓްރެވެލިއަން ކުރެއްވި މަޝްވަރާތަކުގައި އަލިއަޅުވާލާފައިވަނީ އަދުލު އިންސާފު އިސްލާހުކުރުމާއި މޫސުމަށް އަންނަ ބަދަލުތަކާއި ވިޔަފާރިއާއި ސަލާމަތީ ދާއިރާއާ ގުޅުންހުރި ކަންކަމުގައި ދެ ޤައުމުގެ ގުޅުން ބަދަހިކުރުމަށް ހުރި ފުރުސަތުތަކަށެވެ.

އަދި މި ދަތުރުފުޅުގައި ވަޒީރު ޓްރެވެލިއަން ވަނީ ދިވެހި އަންހެން ފަނޑިޔާރުންނާ ބައްދަލުކޮށް، އަދުލު އިންސާފުގެ ދާއިރާއަށް އެހީތެރިވުމަށް ހިންގާ އިނގިރޭސިވިލާތުގެ ޕްރޮގްރާމްތަކުގެ އަސަރު އަޑުއަހާ، އަންހެން ފަނޑިޔާރުންނަށް ކުރިމަތިވާ ގޮންޖެހުންތައް ދެނެގަނެފަ އެވެ.

މީގެ އިތުރުން ވަޒީރު ޓްރެވެލިއަން ވަނީ ދިވެހިރާއްޖޭގައި ހިންގާ ދިވެހި އަދި އިނގިރޭސިވިލާތުގެ ވިޔަފާރިތަކާ ބައްދަލުކުރައްވައި އިނގިރޭސިވިލާތާއި ދިވެހިރާއްޖެއާ ދެމެދު ވިޔަފާރީގެ ގުޅުން އިތުރަށް ބަދަހިކުރުމުގެ ފުރުސަތުތަކާ ބެހޭ ގޮތުން މަޝްވަރާ ކުރައްވާފައެވެ. 

ދަތުރުފުޅުގައި ވަޒީރު ޓްރެވެލިއަން ވަނީ އިނގިރޭސިވިލާތުގެ އެއްބާރުލުމާއެކު ރާއްޖޭގައި ޤާއިމުކޮށްފައިވާ، މެރިން ޕްލާސްޓިކް ލެބަށް ޒިޔާރާތް ކުރައްވާފައެވެ.

ވަޒީރު ޓްރެވެލިއަންގެ ދަތުރުފުޅު މިއަދު ނިންމާލެއްވި އިރު، ވަޒީރު ދިވެހިރާއްޖެއަށް ވަޑައިގެންނެވީ، މޭ މަހުގެ 9 ވަނަ ދުވަހުއެވެ. މިއީ ދެ އަހަރަށްފަހު ރަސްމީ ދަތުރުފުޅެއްގައި އިނގިރޭސި ވަޒީރެއް ރާއްޖެއަށް ޒިޔާރާތްކުރެއްވި ފުރަތަމަ ފަހަރުކަން ފާހަގަކޮށްލެވެއެވެ.