ކުރިއަށް އޮތް ތަނުގައި ރައްޔިތުންގެ މަޖިލީހަކަށް ކުރިމަތިލުމުގެ ވިސްނުމެއް ނެތް ކަމަށާއި، މިއީ ރައްޔިތުންގެ މަޖިލީހުގެ ތަޅުމުގައި މެމްބަރެއްގެ ހައިސިއްޔަތުން ވާހަކަފުޅު ދައްކަވާ ފަހު ދުވަސް ކަމަށް އައްޑޫމީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

މިއަދު ކުރިއަށްދާ 19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި ވާހަކަފުޅު ދައްކަވަމުން ރޮޒައިނާ ވިދާޅުވީ، މިއަދަކީ 15 އަހަރު ދުވަހަށް ފަހު އޭނާ ރައްޔިތުންގެ މަޖިލީހާއި އަލްވަދާއު ކިޔާ ދުވަސްކަމަށާއި، ދެން ކުރިއަށް އޮތް ތަނުގައި ރައްޔިތުންގެ މަޖިލީހަށް ކުރިމަތިލެއްވުމުގެ ވިސްނުމެއް ނެތް ކަމަށެވެ.

ރޮޒައިނާ ވިދާޅުވީ، ތުލުސްދޫ ދާއިރާ އާއި އައްޑޫމީދޫ ދާއިރާގެ ރައްޔިތުން އޭނާ އާއި ހަވާލުކުރެއްވި މަސައްކަތްތައް 15 އަހަރުގެ ތެރޭގައި ކުރެވިފައިވާ ކަމަށް ގަބޫލުފުޅު ކުރައްވާ ކަމަށާއި ފާއިތުވެ ދިޔަ 15 އަހަރުގެ ތެރޭގައި އޭނާގެ ގޮނޑި "ނީލަމުގައި" އިން އެންމެ ދުވަހެއް ވެސް އައިސްފައިނުވާނެ ކަމަށެވެ.

ހަމައެއާއިއެކު، ނިމިދިޔަ އެމްޑީޕީގެ ސަރުކާރުގެ ދާއިރާގެ ކުރިއެރުމަށް ވަރަށް ގިނަ މަސައްކަތްތަކެއް ކުރެވުނު ކަމަށާއި، މީދޫ އާއި މަރަދޫ ފޭދޫ އަކީ އައްޑު ސިޓީގެ އެންމެ އަޅާނުލެވި އޮތް ދެރަށަށްވާއިރު ނިމިދިޔަ ސަރުކާރުގައި މި ދެރަށަށް ވަރަށް ބޮޑު ތަރައްގީއެއް ގެނެސްދެވުނު ކަން ރޮޒައިނާ ފާހަގަކުރެއްވިއެވެ.

ރޮޒައިނާ ގެ އާއިލާ އާއި ރައްޓެހިންގެ އިތުރުން އެކީގައި މަސައްކަތް ކުރެއްވި މެމްބަރުންގެ ފަރާތުން ލިބުނު އެއްބާރުލުމުގެ ސަބަބުން މިއަދު މަޖިލީހުން ނުކުމެގެންދަނީ ވަރަށް ޖޯޝާއި ފޯރީގައިކަން ފާހަގަކުރައްވާ ރޮޒައިނާ ވިދާޅުވީ، 20 ވަނަ ރައްޔިތުންގެ މަޖިލީހަށް ވަޑައިގަންނަވާ 3 އަންހެން މެމްބަރުންނާއި އެކީގައި މަޖިލީހަށް ވަޑައިގަންނަވާ ފިރިހެން ބޭފުޅުންގެ އެއްބާރުލުން ލިބި ރަނގަޅު މަސައްކަތްތަކެއް ކުރުމުގައި އެހީތެރިވެދެއްވުމަކީ އެދުމެއް ކަމަށެވެ. 

ރައްޔިތުން މަޖިލީހަށް މެމްބަރުން ހޮވާއިރު ރައްޔިތުންގެ މަޖިލީހަކީ ހަމައެކަނި ތަޅުމުގައި ވާހަކަދައްކާ ތަނެއް ނޫންކަމަށާއި، އެއީ ކޮމިޓީގެ އެތައް ބުރަ މަސައްކަތްތަކެއް ކުރާ ތަނަކަށް ވާއިރު، ކޮމިޓީތަކުގައި ރަނގަޅު މަސައްކަތްތަކެއް ކުރެވޭނެ ބަޔަކު ހޮވުމަށް ރައްޔިތުން ހަނދާންކުރުމަށް ރޮޒައިނާވަނީ އެދިލައްވާފައެވެ.