އިންޑިއާއިން ރާއްޖޭގެ ބަޖެޓު ސަޕޯޓަށް ދިން 50 މިލިއަން ޑޮލަރުގެ ޓީބިލު ރާއްޖެއިން އަނބުރާ ދައްކަންޖެހޭ މުއްދަތު އިތުރު އެއް އަހަރު ފަސްކޮށްދީފިއެވެ.
މިކަން ހާމަކޮށް ޚާރިޖީ ވުޒާރާއިން މިއަދު ނެރުނު ބަޔާނެއްގައި ބުނީ ބަޖެޓު ސަޕޯޓަށް ދިން އެ ޓީބިލު ދެއްކުން ފަސްކޮށްދިނުމަށް އިންޑިއާ ސަރުކާރުން ނިންމީ މިދިޔަ ހަފުތާ ތެރޭ ފޮރިން މިނިސްޓަރު މޫސާ ޒަމީރު މި މެއި މަހުގެ 8 އިން 10 އަށް އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިން އިންޑިޔާގެ އެކްސްޓާނަލް އެފެއާޒް މިނިސްޓަރު ޖެއިޝަންކަރާއެކު ބޭއްވި ބައްދަލުވުމުގެ ތެރެއިން އެކަމަށް އެދިވަޑައިގަތުމުން ކަމަށެވެ.
އަދި އިންޑިއާގެ ފަރާތުން ރާއްޖެއަށް ބަޖެޓު ސަޕޯޓުގެ ގޮތުގައި ވެދޭ އެހީތެރިކަން ވަރަށް ބޮޑަށް ބަލައިގަންނަ ކަން ފާހަގަކޮށް އެ ބަޔާނުގައި ވަނީ ރާއްޖޭގައި މިހާރު ވެސް އުމްރާނީ ގޮތުން ހިނގަމުން އަންނަ ބޮޑެތި މަސައްކަތްތަކުގައި އިންޑިއާގެ އެހީތެރިކަން އޮތް ކަން ފާހަގަކޮށްފައެވެ.
އަދި ދެ ގައުމުގެ ގުޅުމުން ހަރުދަނާކޮށް ދެ ގައުމަށް ވެސް ފައިދާވާނެހެން އެކީ މަސައްކަތްކުރުމަށް ކުރިއަށް އޮތްތަނުގައި ވެސް ދިވެހި ސަރުކާރުން އުންމީދުކުރާ ކަމަށް ފޮރިން މިނިސްޓްރީން ބުންޏެވެ.
މިކަމާއި ގުޅިގެން ރާއްޖޭގައި ހުންނަ އިންޑިއާ ހައިކޮމިޝަނުން ބުނީ ފައިސާ ދެއްކުން ފަސްކޮދިނީ އިންޓަރެސްޓް ނާރާ ގޮތަށް ކަމަށެވެ.
އިންޑިޔާއިން މި ނިންމި ނިންމުމަށް މަރުހަބާ އާއި ޝުކުރު ދަންނަވައި ޚާރިޖީ ވަޒީރުވެސް ވަނީ މިއަދު އެކްސްގައި ޕޯސްޓެއް ކުރައްވާފައެވެ. އަދި އެއިން ދައްކައިދެނީ ދެގައުމުގެ ދެމެދުގައި އޮތް ޒަމާންވީ ގުޅުން ކަމުގައިވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
