ރާއްޖެއިން ބޭރުން އެތެރެކުރާ، އަދި ރާއްޖޭގައި ހައްދާ ކާބޯތަކެތީގެ ސާމްޕަލް ބޭރަށް ފޮނުވައިގެން އޭގައި ކެމިކަލް ހުންނަ މިންވަރު ތަހުލީލް ކުރަން ނިންމާފައިވާ ކަމަށް ސިއްހަތާއި ބެހޭ ވުޒާރާގެ ވަޒީރު ޑރ. އަބްދުالله ޚަލީލް ވިދާޅުވެއްޖެއެވެ. 

ސިއްހަތާއި ބެހޭ ވުޒާރާގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ޚަލީލު،  ރާއްޖޭގައި ދަނޑުވެރިކަން ކުރާއިރު ތަފާތު ކެމިކަލްތައް ބޭނުންކުރާ ކަމަށެވެ. އެހެން ނަމަވެސް، ދަނޑުވެރިކަން ކޮށްގެން ހައްދާ ތަކެތީގައި ކެމިކަލް ހުންނަ މިންވަރު ދެނެގަތުމަށް ހަދަންޖެހޭ ހުރިހާ ޓެސްޓެއް ރާއްޖެއިން ނުހެދޭ ކަމަށެވެ. 

އެހެންކަމުން، އެތަކެތީގެއާއި، ރާއްޖެ އެތެރެކުރާ ތަރުކާރީ އަދި މޭވާ ފަދަ ތަކެތީގައި ކެމިކަލް ހުރި މިންވަރު ބެލުމަށް ރާއްޖެއިން ބޭރަށް ފޮނުވަން ފަށަން ނިންމަވާފައިވާ ކަމަށް ޚަލީލް ވިދާޅުވިއެވެ. 

އެ ޓެސްޓްތައް ހެދެން ފެށުމުން ކެވޭ ކާބޯތަކެތީގައި ނުރައްކާތެރި މާއްދާތައް ހުރީ ކިހާ މިންވަރަކަށް ކަން އެނގިގެންދާނެ ކަމަށް ވަޒީރު ވިދާޅުވިއެވެ. އަދި ރާއްޖެ އެތެރެކުރާ ފަރާތްތަކަށްވެސް ރައްކާތެރި ކާބޯތަކެތި އެތެރެކުރުމަށް ބާރު އެޅިގެންދާނެ ކަމަށް ވަޒީރު ވިދާޅުވުއެވެ. 

ހަމަ އެހެންމެ ރާއްޖޭގައި ދަނޑުވެރިކަން ކުރާ ފަރާތްތަކަށް ވެސް، އެ ފަރާތްތަކުން އުފައްދާ ތަކެތި ރައްކާތެރިގޮތުގައި ގިނަ ކެމިކަލް ބޭނުން ނުކޮށް އުފެއްދުމަށް ބާރުއެޅިގެންދާނެ ކަމަށް ޚަލީލް ވިދާޅުވިއެވެ. 

އެހެންކަމުން. އެކަން ފެށިގެން ދިޔުމުން ކާބޯތަކެތީގެ ރައްކާތެރިކަން ކަށަވަރު ކުރުމަށް ސަރުކާރުން ކުރަމުންދާ މަސައްކަތަށް ވަރަށް ބޮޑު ކުރިއެރުމެއް ލިބިގެންދާނެ ކަން ވަޒީރު ފާހަގަކުރެއްވިއެވެ.