ރާއްޖޭގައި އޯގަން ޓްރާންސްޕްލާންޓު ނުވަތަ ގުނަވަން ބަދަލު ކުރާ އޮޕަރޭޝަންގެ ޚިދުމަތް ތައާރަފް ކުރުމަށްޓަކައި ބިލެއް އެކުލަވާލުމުގެ މަސައްކަތް ސަރުކާރުން ކުރަމުންދާ ކަމަށް ހެލްތު މިނިސްޓަރު ޑރ. އަބްދުالله ހަލީލް ވިދާޅުވެއްޖެއެވެ.

ހެލްތު މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި އޯގަން ޓްރާންސްޕްލާންޓް، ޚާއްސަކޮށް ކިޑްނީ ފަދަ ގުނަވަންތަކުގެ ޓްރާސްޕްލާންޓް ކުރުމަށް ގާނޫނީ ހުރަސްތައް ހުރިކަން ފާހަގަކޮށް އެ ހުރަސް ނައްތާލުމަށް ސަރުކާރުގެ ވިސްނުން ހުރިތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ހަލީލް ވިދާޅުވީ، އޯގަން ޓްރާންސްޕަލާންޓު ކުރުމަކީ ދުނިޔޭގެ އެކި ކަންކޮޅުތަކުގައި ވަރަށް ބޮޑަށް ރެގިއުލޭޓް ކުރެވިގެން ގާނޫނެއްގެ ތެރެއިން ހަރުދަނާ އުސޫލުތަކަކާއެކު ކުރާ ކަންތައްތަކެއް ކަމަށެވެ.

އެހެންކަމުން, އެކަމާބެހޭ ބިލެއް ޑްރާފްޓު ކުރުމުގެ މަސައްކަތް ކަމާބެހޭ ފަރާތްތަކާ ގުޅިގެން ކުރަމުން އަންނަ ކަމަށާއި 20 ވަނަ ރައްޔިތުންގެ މަޖިލީހުގެ މަސައްކަތް ފެށިގެން ދިޔުމުން އެކަމާއި އެ ބިލު މަޖިލީހަށް ހުށަހަޅުއްވާނެ ކަމަށް ހަލީލް ވިދާޅުވިއެވެ.

Advertisement

އޯގަން ޓްރާންސްޕްލާންޓާ ބެހޭ ގާނޫނެއް ވުޖޫދަށް ގެނައުމުން އެ ހިދުމަތް ވެސް ރާއްޖޭގައި ގާއިމުވެގެންދާނެކަން ފާހަގަކުރައްވަމުން ހަލީލް ވިދާޅުވީ, ރާއްޖޭގެ ބައެއް ޕްރައިވެޓް ހޮސްޕިޓަލްތަކުން އެ ހިދުމަތް ދިނުމުގެ ޝައުގުވެރިކަން ފާޅުކޮށްފައިވާ ކަމަށެވެ.