ރާއްޖޭގައި އޯގަން ޓްރާންސްޕްލާންޓު ނުވަތަ ގުނަވަން ބަދަލު ކުރާ އޮޕަރޭޝަންގެ ޚިދުމަތް ތައާރަފް ކުރުމަށްޓަކައި ބިލެއް އެކުލަވާލުމުގެ މަސައްކަތް ސަރުކާރުން ކުރަމުންދާ ކަމަށް ހެލްތު މިނިސްޓަރު ޑރ. އަބްދުالله ހަލީލް ވިދާޅުވެއްޖެއެވެ.
ހެލްތު މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި އޯގަން ޓްރާންސްޕްލާންޓް، ޚާއްސަކޮށް ކިޑްނީ ފަދަ ގުނަވަންތަކުގެ ޓްރާސްޕްލާންޓް ކުރުމަށް ގާނޫނީ ހުރަސްތައް ހުރިކަން ފާހަގަކޮށް އެ ހުރަސް ނައްތާލުމަށް ސަރުކާރުގެ ވިސްނުން ހުރިތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ހަލީލް ވިދާޅުވީ، އޯގަން ޓްރާންސްޕަލާންޓު ކުރުމަކީ ދުނިޔޭގެ އެކި ކަންކޮޅުތަކުގައި ވަރަށް ބޮޑަށް ރެގިއުލޭޓް ކުރެވިގެން ގާނޫނެއްގެ ތެރެއިން ހަރުދަނާ އުސޫލުތަކަކާއެކު ކުރާ ކަންތައްތަކެއް ކަމަށެވެ.
އެހެންކަމުން, އެކަމާބެހޭ ބިލެއް ޑްރާފްޓު ކުރުމުގެ މަސައްކަތް ކަމާބެހޭ ފަރާތްތަކާ ގުޅިގެން ކުރަމުން އަންނަ ކަމަށާއި 20 ވަނަ ރައްޔިތުންގެ މަޖިލީހުގެ މަސައްކަތް ފެށިގެން ދިޔުމުން އެކަމާއި އެ ބިލު މަޖިލީހަށް ހުށަހަޅުއްވާނެ ކަމަށް ހަލީލް ވިދާޅުވިއެވެ.
"އަޅުގަނޑުމެން ވެސް ބިލެއް ޑްރާފްޓު ކުރުމުގެ މަސައްކަތް ކުރަމުން އެބަ ގެންދަން އެކަމާ (އޯގަން ޓްރާންސްޕްލާންޓް) ގުޅުން ހުރި އެކި ފަރާތްތަކާ ގުޅިގެން. އެކަން ކަމަކީ ހަރުދަނާ އުސޫލުގެ ތެރެއިން ނޫނީ ކުރެވޭނެ ކަންކަމެއް ނޫން. އެ ގާނޫނު އަދި މިހާރުން މިހާރަށް ނަޔަސް، އަޅުގަނޑުމެން އެފަދަ ފަރާތްތަކަށް މިހާރުވެސް ފައިސާ އަދި އެހެނިހެން ލުއިތައް ފޯރުކޮށްދެމުން މިދަނޫ. އޭގެ އިތުރުން، ގާނޫނު އަޅުގަނޑުމެން މި ބަލަނީ, އަލަށް އަންނަ މަޖިލީހުގެ ތެރެއިން ވުޖޫދު ކުރެވޭނެ ކަމަށް,"
މިނިސްޓަރު ޑރ. އަބްދުالله ހަލީލް
އޯގަން ޓްރާންސްޕްލާންޓާ ބެހޭ ގާނޫނެއް ވުޖޫދަށް ގެނައުމުން އެ ހިދުމަތް ވެސް ރާއްޖޭގައި ގާއިމުވެގެންދާނެކަން ފާހަގަކުރައްވަމުން ހަލީލް ވިދާޅުވީ, ރާއްޖޭގެ ބައެއް ޕްރައިވެޓް ހޮސްޕިޓަލްތަކުން އެ ހިދުމަތް ދިނުމުގެ ޝައުގުވެރިކަން ފާޅުކޮށްފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
