މިއަދު ހަވީރު މާލެ ސަރަހަށްދަށް، ގަދަ ވަޔާއެކު ކުރި ވިއްސާރައިގައި ހުޅުމާލޭގައި އިމާރާތްކުރަމުން އަންނަ އެޕޯލޯ ޓަވަރުތަކުގެ ތެރެއިން ޓަވަރެއްގެ ސޭފްޓީ ފެންސް ވެއްޓިއްޖެއެވެ.

ހުޅުމާލެ ރީތިގަސް މަގުގައި އިމާރާތްކުރަމުން އަންނަ މި ޓަވަރުގެ ފެންސް ގަނޑު، ހަވީރު ކުރި ވިއްސާރަޔާއި ގަދަ ވަޔާއެކު މަގު މައްޗާ ދިމާއަށް އަރި އަޅައިލައި ވެއްޓިފައިވާ އިރު، އެ ވަގުތު ވެސް އެ ސަރަހައްދުގައި ވެހިކަލްތައްވެސް އައީ ދުއްވަމުންނެވެ. 

މި ހާދިސާއާއި ގުޅިގެން ފުލުހުންގެ އިސް ތަރުޖަމާނު އަހްމަދު ޝިފާން އެކްސްގައި ކުރެއްވި ޕޯސްޓެއްގައި ވަނީ މޫސުން ގޯސްވާ މި ފަދަ ހާލަތްތަކުގައި މީހުން ދިރިއުޅޭ ސަރަހައްދުތަކާއި ދުރު ސަރަހައްދުތަކުގައިވެސް ހުންނަ ކޮންސްޓްރަކްޝަން ސައިޓުތަކުގައި އެއްވެސް ނުރައްކަލެއް ކުރިމަތި ނުވާނެހެން ރައްކާތެރިކަމުގެ ފިޔަވަޅު އަޅައިފައި ހުންނަކަން ކަށަވަރު ކުރުމަށް އެދުވަޑައިގެންފައެވެ.

އަދި މިއަދު ހިނގި ހާދިސާފަދަ ކަންކަން ތަކުރާރު ނުވާނެހެން ސަމާލުވުމަށް ވެސް ޝިފާން އިލްތިމާސްކުރެއްވިއެވެ.

މީގެ އިތުރުން އެ އިމާރާތުގެ ފެންސްތައް ވަޔާ ދާތީ، ޓަވަރު ހުރި މަގު ބަންދުކޮށް ފުލުހުން އެ ސަރަހައްދުގައި ހަރަކާތްތެރިވަމުންދާ ކަމަށްވެސް ދާދި ދެންމެ އަކު ފުލުހުންގެ މީޑިއާ އޮފިޝަލް ވަނީ ވިދާޅުވެފައެވެ.