މޫސުން ގޯސްވުމުގެ ސަބަބުން، އިރާނުގެ ރައީސް ދަތުރުކުރެއްވި ހެލިކޮޕްޓަރު ހޯދުމަށް ވައިގެމަގުން ކުރަމުންދިޔަ މަސައްކަތްތައް މެދުކަނޑާލައިފިއެވެ.

އެމަޖެންސީ ސާވިސަސް އޯގަނައިޒޭޝަންގެ ތަރުޖަމާނު ބާބަކް ޔެކްޓަޕަރަސްޓް ވިދާޅުވި ގޮތުގައި، އިރު އޮއްސުމާއެކު، ހެލިކޮޕްޓަރު ހޯދުމަށް، ވައިގެ މަގުން ކުރަމުން ދިޔަ މަސައްކަތްތަކަށް ވަނީ ވަރަށް ބޮޑަށް ހުރަސްއެޅިފައެވެ. އަދި އިތުރަށް އެ މަސައްކަތް ކުރިއަށް ގެންދެވެން ނެތުމުން، މިހާރު ވައިގެ މަގުން، ހެލިކޮޕްޓަރު ހޯދުން މެދުކަނޑާލާފައިވާކަމަށެވެ.

ނަމަވެސް، އޮޕެރޭޓު ކުރެވޭނެ ދަނޑިވަޅަކަށް ތައްޔާރުގައި، ތަބްރީޒާއި ތެހެރާނުގައި، އެއަރ އެމްބިއުލާންސްތައް ހުރިކަން އޮފިޝަލް ވަނީ ފާހަގަކުރައްވާފައެވެ.

Advertisement

ބާބަކް ޔެކްޓަޕަރަސްޓް އިތުރަށް ވިދާޅުވީ، ހެލިކޮޕްޓަރު ވެއްޓުނު ކަމަށް ބެލެވޭ ސަރަހައްދަށް އިތުރު އެމްބިއުލާންސްތައް ފޮނުވާފައިވާކަމަށެވެ. 

އިރާނުގެ ރައީސް އިބްރާހީމް ރައިސީއާއި އެ ޤައުމުގެ ޚާރިޖީ ވަޒީރު ދަތުރު ކުރައްވަމުން ދިޔަ ހެލިކޮޕްޓަރު، ގެއްލިފައިވާއިރު، ހެލިކޮޕްޓަރު ހޯދުމަށް ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އީރާނުގެ ރެޑް ކްރެސެންޓުން 40 ޓީމެއް ފޮނުވައިފައިވާއިރު، ހެލިކޮޕްޓަރު ހޯދުމަށް އިރާނުގެ ސަލާމަތީ ބާރުތަކުގެ ހުރިހާ ވަސީލަތްތައް ބޭނުންކުރުމަށްވެސް ވަނީ އަންގައިފައެވެ.