އީރާން ގެ ރައީސް އިބްރާހިމް ރައީސީ އަވަހާރަވުމާއި ގުޅިގެން އީރާން ގެ ރިޔާސީ އިންތިހާބު މި އަހަރުގެ ޖޫން 28 އަށް އަވަސް ކުރުމަށް ނިންމައިފިއެވެ.

އެގައުމުގެ ދައުލަތުގެ ނޫސް އެޖެންސީ އިރްނާ އިން ބުނާ ގޮތުގައި އީރާނުގެ 14 ވަނަ ރިޔާސީ އިންތިހާބު މިފަދައިން ބޭއްވުމަށް ނިންމާފައިވަނީ އެގައުމުގެ ޝަރުއީ ދާއިރާ އާއި ގާނޫނު ހަދާ ބޭފުޅުންނާއި އެކު ބޭއްވި ބައްދަލުވުމަކަށް ފަހުއެވެ.

އެގޮތުން މި އިންތިހާބުގައި ކުރިމަތިލުމުގެ ފުރުސަތު ހުޅުވާލާނީ މެއި މަހުގެ 30 ވަނަ ދުވަހު ކަމަށްވާއިރު، ކެނޑިޑޭޓުން ކެމްޕެއިން ކުރުމަށް ފުރުސަތުދޭނީ ޖޫން މަހުގެ 12 އިން އެމަހުގެ 27 ވަނަ ދުވަހާއި ހަމައަށެވެ.

Advertisement

އީރާން ގެ ރައީސް ރައީސީ އަވަހާރަވެފައިވަނީ އީރާން-އަޒަރުބައިޖާންގައި އޮތް ހަފްލާއެއްގައި ބައިވެރިވެވަޑައިގަތުމަށް ފަހު އެނބުރި ގައުމަށް ވަޑައިގަންނަވަނިކޮށް ދަތުރުކުރައްވަމުން ގެންދެވި ހެލިކޮޕްޓަރަށް މައްސަލައެއް ދިމާވެ، ވެއްޓުމާއި ގުޅިގެންނެވެ.

އެވަގުތު އެ ހެލިކޮޕްޓަރުގައި އީރާނުގެ ފޮރިން އެފެއާޒް މިނިސްޓަރު ހުސައިން އަމީރު އަބްދުﷲ އާއި އިރުމަތީ އަޒަރުބައިޖާން ޕްރޮވިންސްގެ ގަވަރުނަރު މަލިކު ރަހުމަތީ އާއި ތަބްރީޒް ޕްރޮވިންސް ގެ އިމާމު  އާޔަތުﷲ އަލީ ހާޝިމް ވެސް ދަތުރުކުރެއްވިއިރު، މިހާދިސާގައި މި ހުރިހާ ބޭފުޅުން ވެސް ވަނީ އަވަހާރަވެފައެވެ.

މި ހާދިސާ އާއި ގުޅިގެން އެގައުމުގެ ވަގުތީ ރައީސް ކަމުގެ މަގާމް ފުރުއްވަމުން ގެންދަވަނީ އީރާނުގެ ފުރަތަމަ ނައިބު ރައީސް މުހައްމަދު މޮޚްބެރު އެވެ.