ލަންޑަނުން ސިންގަޕޫރަށް ދަތުރު ކުރި ފްލައިޓެއް، ކޮޅިގަނޑެއްގައި ޖެހި 30 އަށްވުރެ ގިނަ މީހުންނަށް އަނިޔާވެ އެކަކު މަރުވެއްޖެއެވެ.

ލަންޑަނުން ސިންގަޕޫރަށް ދަތުރުކުރި ސިންގަޕޯރ އެއަރލަިއންގެ ފްލައިޓު، ބޮއިންގް 777-300އީއާރު ވަނީ ރާޢްޖެ ގަޑިން، މިއަދު މެންދުރު 13:45 ހާއިރު ބެންކޮކަށް ޑައިވަރޓްކޮށް، ކުއްލި ގޮތަކަށް ޖައްސާފައެވެ.

އެ ފްލައިޓުގައި 211 ފަސިންޖަރުންނާއި 18 ކްރޫއިން ދަތުރުކުރިއިރު، ސިންގަޕޯރ އެއަރލައިނުން މައުލޫމާތުދެއްވި ގޮތުގައި ބޯޓުގައި ތިބި 31 މީހަކު ވަނީ ހޮސްޕިޓަލަށް ގެންގޮސްފައެވެ.

ކޮޅިގަނޑުގައު ޖެހުނު ފްލައިޓު ތެރެ - ފޮޓޯ: ރެއުޓަރސް

ތައިލެންޑުގެ ކަމާބެހޭ ފަރާތްތަކުން ބުނާ ގޮތުގައި މި ހާދިސާގައި މަރުވެފައިވަނީ އުމުރުން 73 އަހަރުގެ އިނގިރޭސި ފިރިހެނެކެވެ. އަދި ބެންކޮކްގެ ކަމާބެހޭ ފަރާތްތަކުން ހާމަކުރެއްވި ގޮތުގައި އެމީހާ މަރުވި ކަމަށް ބެލެވެނީ ހާޓް އެޓޭކެއް ޖެހިގެންނެވެ. 

ފްލައިޓުގެ ހިނގި އެކްސިޑެންޓުގެ އިތުރު ތަފްސީލު އަދި، ކަމާ ބެހޭ ފަރާތްތަކުން ހާމަކުރައްވާފައެއް ނުވެއެވެ. ނަމަވެސް ފްލައިޓުގައި ތިބި ފަސިންޖަރުން ބުނީ ކުއްލިއަކަށް މަތިންދާބޯޓު ވެއްޓުނީ ކަމަށެވެ.

މި ހާދިސާއާ ގުޅިގެން ސިންގަޕޫރުގެ ޓްރާންސްޕޯޓް މިނިސްޓަރު ޗީ ހޮންގް ޓަޓް ވަނީ ފަސިންޖަރުންނާއި އެމީހުންގެ އާއިލާތަކަށް ސަރުކާރުން އެހީތެރިކަން ފޯރުކޮށްދޭނެ ކަމަށް ވިދާޅުވެފައެވެ.