ސަރުކާރުގެ ކުންފުނިތަކުގައި ތިއްބެވި ބޭފުޅުން މަގާމުން ވަކިކޮށް ނުވަތަ ބަދަލުކުރެވެނީ ސަރުކާރު ހިންގުން ހަރުދަނާކޮށް ފަސޭހަކުރުމަށް ކަމަށް ރައީސް އޮފީހުގެ އިސް ތަރުޖަމާނު ހީނާ ވަލީދު ވިދާޅުވެއްޖެއެވެ.
މި ހަފްތާ ތެރޭގައި ސަރުކާރުގެ އެކިއެކި ކުންފުނިތަކުގައި ތިބި ބޭފުޅުން މަގާމުން ވަކިކޮށް ސަސްޕެންޑް ކުރެވިފައިވެއެވެ.
އެގޮތުން، އެމްއެމްޕީއާރްސީގެ ޗެއާޕާސަން ޢާއިޝާ ނޫރައިން ޖަނާހް މިދިޔަ އަންގާރަ ދުވަހު އެ މަގާމުން އިސްތިއުފާ ދެއްވާފައި ވަނިކޮށް، ރައީސް މުޢިއްޒު ވަނީ އިއްޔެ ކުންފުނީގެ މެނޭޖިން ޑިރެކްޓަރު ފާތިމަތު ތައުފީގު މަގާމުން ވަކި ކުރައްވާފަ އެވެ.
އޭގެ ފަހުން އެޗްޑީސީގެ ޗެއާމަންގެ މަގާމުން އަހްމަދު ޒުހައިރުވެސް މަގާމުން ވަކިކުރައްވާފައިވާއިރު، ދެ ޑެޕިއުޓީ މިނިސްޓަރަކު ވަނީ ސަސްޕެންޑް ކުރައްވާފަ އެވެ.
އެކަމާއި ގުޅިގެން މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ކުރެއްވުނު ސުވާލަކަށް ޖަވާބު ދެއްވަމުން ހީނާ ވިދާޅުވީ ސަރުކާރު ހިންގުމުގައި ފަސޭހަވާގޮތަށް ކަންކަން ނިންމެވުމަށް ރައީސުލްޖުމްހޫރިއްޔާއަށް ބާރުތަކެއް ލިބިގެންވާކަމަށެވެ.
އޭގެތެރޭގައި ކުންފުނިތަކަށް ބޭފުޅުން އައްޔަނު ކުރުމާއި، އަދި މަގާމުގައި ހުންނަ ބޭފުޅުން ބަދަލު ކުރުމުގެ ކަންކަންވެސް ކުރެއްވުމަށާއި، ވުޒާރާތަކަށް ބޭފުޅުން އައްޔަނު ކުރުމުގެ ބާރު ވެސް ލިބިދޭ ކަމަށް ހީނާ ވިދާޅުވިއެވެ.
"އެގޮތުގެ މަތިން ސަރުކާރު ހިންގުމުގަ އެމަނިކުފާނަށް ބޭނުންފުޅުވާ ކަންކަން ފަސޭހަފުޅު ކުރެއްވުމަށް ނުވަތަ އިތުރަށް ހަރުދަނާކޮށް ރަގަޅު ކުރުމަށްޓަކާ ކުރައްވަން ޖެހޭ ކަންތައްތައް އެމަނިކުފާނު އަބަދުވެސް ކުރައްވަމުން ގެންދަވާނެ،" ހީނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
