ކުރިއަށް އޮތް ހަފްތާ ބަންދުގައިވެސް ރާއްޖެ އަށް މޫސުން ގޯސްވާނެ ކަމަށް މޫސުމާއި ބެހޭ އިދާރާ (މެޓް އޮފީސް) އިން ލަފާކޮށްފިއެވެ.
އެގޮތުން މެޓް އޮފީހުން ބުނީ، ހުކުރު ދުވަހާއި ހޮނިހިރު ދުވަހު ވެސް އުތުރުގެ ރަށްތަކަށް ގަދަ ވަޔާއި އެކު ވިއްސާރަ ވެހޭނެ ކަމަށެވެ. އަދި މެދު ރާއްޖެ ތެރެއަށް ހުކުރު ދުވަހު ގަދަވަޔާއި ބޯކޮށް ވާރޭވެހޭނެ ކަމަށާއި، ހޮނިހިރު ދުވަހު މެދު ރާއްޖެ ތެރޭގައި ހިމެނޭ ރަށްތަކަށް ވިއްސާރަ ކުރާނެ ކަމަށް ވެސް އެއިދާރާއިން ވަނީ ލަފާކޮށްފައެވެ.
ހަމައެއާއިއެކު، ދެކުނުގެ ރަށްތަކަށް ކެރީގެ އަސަރު ކުރުން އެކަށީގެންވާކަމަށް މެޓް އޮފީހުން ބުނެއެވެ.
ހުޅަނގު މޫސުމުގެ ބާރު ގަދަވުމާއި ގުޅިގެން ރާއްޖޭގެ އެކި ސަރަހައްދުތަކަށް ދަނީ މޫސުން ގޯސްވެ ވިއްސާރައިގެ އަސަރު ކުރަމުންނެވެ.
އެކަމާއި ގުޅިގެން މިއަދުގެ ހަވީރު 15:15 އިން ފެށިގެން މިރޭ 19:15 އާއި ހިސާބަށް ހއ އަތޮޅުން ފެށިގެން ވ އަތޮޅަށް އޮރެންޖު އިންޒާރު ނެރެފައިވާއިރު، ބޯކޮށް ވާރޭ ވެހި ވަޔާއި ކަނޑު ގަދަވެ، އުދައަރާނެ ކަމަށް ލަފާ ކުރެވޭތީ ހުރިހާ ފަރާތްތަކުން, ހާއްސަކޮށް ކަނޑު ދަތުރުފަތުރު ކުރާ ފަރާތްތަކުން މޫސުމަށް ސަމާލު ވުމަށް މެޓް އޮފީހުން ވަނީ އެދިފައެވެ.
މެޓް އޮފީހުގެ އިތުރުން، ފުލުހުންނާއި ސިފައިން ވެސް ވަނީ ކޮންމެހެން ކުރަން ޖެހޭ ދަތުރެއް ނޫނީ ނުކުރުމަށް އިލްތިމާސް ކުރައްވާފައެވެ.
Advertisement
This content is created and paid for by advertisers and does not involve Voice Journalists
